ने. सं. ११४४ कौलाथ्व एकादशी - चालं

प्रम ओलीया धःया लः व प्रचण्डया खिति

कोरोनाया महाप्रकोपं दछितक सम्पूर्ण जात्रापर्व दक्वं दित । मनूत मुने मजिउ, भिड याये मजिउ । कोरोनाया संक्रमण तच्वइ । लां लां तक लकडाउन याइ । मनूतय्त छेँय् कुनी । जनताया सामान्य जीवन अस्तव्यस्त जुइ । थाःगः हे दइमखु । संक्रमणया भय यथावत हे तिनि । कोरोनाया त्रासं जनजीवनय् शिथिलता खने दुसां देय् या राजनीतियात धाःसा कोरोनां थिइ फुगु खनेमदु ।

हारां खनाः नारां ग्याः धाःथें ! राजनीतिज्ञतय् सक्रियताय् कोरोनां छुं नं कमी हःगु खनेमदु। अःखः अझ कोरोनाया संक्रमणया इलय् देय्या राजनीतिइ गुगु सरगर्मी खने दत, गुगु चलखेल खने दत व अभूतपूर्व धाःसां छुं पाइमखु । शायद राजनीतिइ च्वंपिं तग्वः छ्यंत खनाः कोरोना नं ग्याःगु खःला छु ? नेतातय्सं कोरोनाया परवाह तःगु खनेमदु ।

थौंकन्हय् । नेकपाया ल्वापुं विकराल रुप कासेंलि न्हियान्हिथं विभाजित समूहतय् जुलुसत वयाच्वनी । सभा सम्मेलन जुयाच्वनी । हुलकुल जुइक मनूतय्सं ब्वति कयाच्वनी । सम्बन्धित गूटया शिर्षस्थ नेतातय्सं भाषण बियाच्वनी । देय्या वातावरण थौं आन्दोलनमय । कोरोनाया भय, त्रासयात देय्या नेतातय्सं कय्तां त्वपुइधुंकल । खतुं नेकपा दुनेया गुटबन्दी दथुइ कालबिलया ल्वापुया कारणं न्हियान्हिथं भाषण, जुलुसत जुयाच्वंगु खः । नेतातय् भाषणया गुदि नं भागबन्डाया असन्तोष खः । देय् व जनताया समस्याया कारणं ल्वापु जूगु मखु । थ्व सकसिनं सिउगु खँ खः ।

देय् व जनतायात सुख सुविधा बीगु खँय् नेतातय् दथुइ स्वस्थ प्रतिस्पर्धा जुइ माःगु खः । तर देशय् खनेदुपिं नेतात फुक्क मात्र शक्तिया लोभि खः, इपिं देय्यात नेतृत्व बीत लायक मखु ।

तर नेतातय् भाषण न्यनेबलय् इपिं देय् व जनताया हित व कल्याणया निंतिं सतकय् वयाच्वनागु खः । ल्वापुइ संलग्न पक्षतसें वकालत याइ । छगू पक्षं मेगु पक्षयात विध्वंशकारी धकाः आरोप याइ । थःथःगु पक्षया भीड मुंकी । मानों तुरन्त हे देशय् तःधंगु आन्दोलन यानाः देय्यात स्वर्गय् थ्यंकेगु भ्रम ह्वली । तर आम जनतां थुइके धुंकल कि नेकपा दुनेया निगू गूटया ल्वापु त्वाः त्वालय् लाछि खिचातय् दथुइ जुइगु ल्वापु बाहेक मेगु छुं मखु । नेतातय् स्वार्थन्धता बाहेक थौं जुयाच्वंगु ल्वापुइ छुं तुक मदु। देय्या हालत गन थ्यने धुंकल ? कोरोनां देय्यात गज्याःगु दुष्प्रभाव लाकल ? देशय्को रोनाया खोपया व्यवस्था गथे यानाः यायेगु ? थज्याःगु सार्वजनिक समस्याया निंतिं थौं देय्या नेतातय्त मतलब मदु ।

सु प्रधानमन्त्री जुइगु ? सु राष्ट्रपति जुइगु ? पार्टीया अध्यक्षय् सु च्वनेगु? नेकपा दलया प्यम्ह न्याम्ह नेतातय् दथुइ शक्ति लुछाचुँड, हानथापया निंतिं सम्पूर्ण जनता, देय्यात थौं बन्दी याना बिउगु दु । थुपिं प्यम्ह न्याम्ह नेतातय् स्वार्थं देय् ठप्प जूगु दु । देय् सलंसः दँ लिउने लाः वनेधुंकूगु दु । देय् व जनतायात सुख सुविधा बीगु खँय् नेतातय् दथुइ स्वस्थ प्रतिस्पर्धा जुइ माःगु खः । तर देशय् खनेदुपिं नेतात फुक्क मात्र शक्तिया लोभि खः, इपिं
देय्यात नेतृत्व बीत लायक मखु । देय् थुमिगु चंगुलय् लाःसा अझ गालय् लाइ शंका मदु। तर दुःखया खँ युवापुस्तां थौ ंया बेकम्मा नेतातय्त छाय् थुइके मफुत ?

प्रम ओलीजुं थौंकन्हय् थःगु गुटया नेतृत्व बियाः भाषण बी । ‘जिं ट्यांका काः ट्यांका लखं प्रचण्डयात सिला तर वया मनया खिति तुइके मफु ।’ जनताया लः त्वने मखं । प्रम ओलीजुं गनं ट्यांका काः ट्यांका लः हल जुइ । मेलम्ची मवनी । शायद धःया लखं सिल जुइ ! उकिं प्रचण्डजुया खिति मवन जुइ । अझ प्रधानमन्त्रीजुं स्वयमया ल्हाः नं नवल जुइ । खिधःया लखं राजनीतिया सफाइ धुलाइ याइगुलिं हे थौंकन्हय् नेतात, राजनीति दुर्गन्धित जूगु जुइ । प्रमजुं मेगु छता रोचक खँ नं धाइ । ‘जिगु व्रिफकेश प्रचण्डलिसे जूगु असंख्य सहमतिं जायेधुंकल ।’ प्रधानमन्त्रीया व्रिफकेश देय्या ततःधंगु योजनां जायेमाःगु, जनतायात सुख सुविधा बीगु कार्यक्रमं जायेमाःगु? तर दुर्भाग्य ! प्रधानमन्त्रीया व्रिफकेश धइगु साधारण व्रिफकेश जुइ मखु । मखु । व जनता, देय्या भाग्यया व्रिफकेश जुइ । जुइमाः । तर विडम्बना । फय्गं सहमतितसें प्रधानमन्त्रीया व्रिफकेश जाः वन धाःसा देय्या भाग्य छु जुइ ? जनतां थौं भाग याये मालाच्वंगु दु ।

‘नेकपा फुट मजूनि । जि थुकिया तेस्रो धार खः । मिले यायेगु पक्षय् क्रियाशील नेता वामदेवं धया जुइ । वामदेवजु थौंकन्हय् जनताया मिखाय् पेन्डुलम थें ! शायद सर्वो च्चं संसद विघटनया बारे नयाय बिल कि गुखेर वनाः न्या लाये दइ, उकिया हे लागि वामदेव पियाच्वंगु दु। थ्व हे ताकयात वय्कलं स्वंगूगु धार धाःगु जुइमाः । मेखेर नेकांया नेता शेरबहादुर देउवां ‘जितः ज्योतिषं न्हय्क्वः प्रधानमन्त्री जुइ धाःगु दु ।’ धकाः धुक्क जुयाः नेकपाया ल्वापुइ न्या लाये दइ ला धकाः आशा यानाच्वंगु दु ।