रहस्य सीकेमाःगु दु !
देशय् थौं गुरु गम्भिर न्ह्यसः खनेदइ । धाथें थन सरकार दु ला ? दुसा गन दु ? सुनां संचालन यानाच्वन ? थन सरकारया अर्थ पिनेया ब्वसा सरकारया खँ मखु । पिने ला सरकार दु । दुईतिहाइ मत प्राप्त सरकार । इतिहासय् दकलय् बलवान सरकार । निगू क्रान्तिकारी वाम दल जानाः निर्माण जूगु सरकार ! पिनेया शारीरिक गठन, फुर्ति स्वयेबलय् थ्व सरकार धाथें बलवान जुइमाःगु खः ।
देय्यात थ्वं जादूमय गतिं विकासया लँय् यंके फयेमाःगु खः । जनतां तःधंगु आशा याःगु नं खः । तर ग्व ?! दुःखया खँ थौंया यथार्थय् देय्या हालत थुलि गंजागोल, बेहाल । देय् थौं गुखेपाखे वनाच्वन ! अन्ततः देय् गन थ्यनी ? सुखद भविष्यवाणी याये फइगु स्थिति पटक्क हे मदु । बरु । अःखः न्हियान्हिथं देय् अनिश्चित दिशापाखे वनाच्वन ला ?! देशवासीतय्त चिन्ता जुइ !
सामान्य ज्ञानं धाइ । प्रचण्ड बहुमत दुगु सरकारं शासन व्यवस्था क्वातुक न्ह्याकी । देय्यात द्रुत गतिं विकासया लँय् न्ह्याकी । तर देय्या थौंया परिस्थितिं धाइ । गति लाःगु सरकार जुइत प्रचण्ड बहुमतं जक मगाः खनी ! सम्भव मजू खनी ! राज्य संचालन यायेगु खूबी, इच्छाशक्ति, दूरदर्शिता नं माः । अझ ।
निश्चित लक्ष्यपाखे न्ह्याके फुम्ह दक्ष नेता नं माः । थौं देशय् सरकारया प्रचण्ड बहुमतया खँय् बय्बय् जुइ । संसदीय व्यवस्थाय् हे खः । संसदया प्रचण्ड बहुमत प्राप्त प्रधानमन्त्री तसकं हे शक्तिशाली जुइ । तर । प्रचण्ड बहुमत व शक्तिं जक दक्वं ज्याखँ सुथां लाइमखु ।
प्रचण्ड बहुमतया आधार छु खः ? अन सैद्धान्तिक समानता गुलि दु ?
मात्र शक्ति प्राप्तिया निंतिं महामिलावतया रुपय् निर्मित प्रचण्ड बहुमतया हिसाबकिताब सदां शक्ति कःघाना तयेगु ख्यलय् तक्यनाच्वनी । देय्या विकास, जनताया स्वार्थ अज्याःगु प्रचण्ड बहुमतं गौण खंकी । थौं देशय् संसदया प्रचण्ड बहुमतं ल्ययातःम्ह शक्तिशाली प्रधानमन्त्री दु । जरुर देय्या विकास याइम्ह नेता शाक्तिशाली जुइमाः ।
थौं देशय् राज्यया प्रमुख संवेदनशील संस्थात दक्व दक्व हे धइथें धरासायी जुया वनाच्वंगु दु । थीथी विश्वविद्यालयतय् हालत गुलि भ्रष्टं ग्रस्त ? अनेक काण्डं क्यनाच्वंगु दु । देय्या शिक्षा ख्यःया प्राज्ञिक मर्यादा, विशुद्धता थौं संकटय् लानाच्वंगु दु ।
कमजोर नेतां देय्यात न्ह्याके फइमखु । अझ संसदीय व्यवस्थाय् ला बहुमत प्राप्त प्रधानमन्त्री तसकं शक्तिशाली जुइ । व व्यवस्थायात प्रधानमन्त्रीया निरंकुशताया व्यवस्था नं धाइ । तर निरंकुशताया अर्थ द्वैध जुइ । सक्षम प्रधानमन्त्रीया परम शक्तियात देय् व जनताया निंतिं निर्वाध रुपय् छ्यली ।
महत्वकांक्षी प्रधानमन्त्रीं थःगु शक्ति निरंकुशताया मात सन्तुष्ट यायेत छ्यली । उकिं देश निर्माणया निंतिं शक्ति अनिवार्य जुइ । तर शक्तियात गुगु उद्देश्यं नेतृत्वं छ्यली, उकिया महत्व दइ । थौं देशय् नेतृत्वं थःगु परम शक्ति देय्यात सुसंगठित, सुव्यवस्थित यायेत छ्यले फुगु दु ला ? विचारणीय जुइ ।
देय्या विकासया निंतिं पद्दति (सिष्टम)या विकास व कार्यान्वयन अतिकं महत्वपूर्ण जुइ । गुलिखे विकसित देशय् देश पद्दतिं (सिष्टमं) संचालन जुयाच्वनी । पद्दतियात उल्लंघन याइपिं दण्डित जुइ । अन भनसुन वा मुलाइजाया खँ जुइमखु । न्ह्याथे हे शक्तिशाली, उच्च पदस्थ याःम्ह जूसां पद्दति अन्तर्गत लाइ ।
अथे हे देय्या मेरुदण्ड जुयाच्वंगु प्रमुख संस्थात मजबुत जुइमाः । इमिगु संचालन इमिगु संस्थागत लक्ष्य, धर्मकथं जुइमाः । अनावश्यक बाह्य हस्तक्षेपं संस्थात स्वतन्त्र जुइ दयेमाः ।दुःखया खँ । थौं देशय् राज्यया प्रमुख संवेदनशील संस्थात दक्व दक्व हे धइथें धरासायी जुया वनाच्वंगु दु । थीथी विश्वविद्यालयतय् हालत गुलि भ्रष्टं ग्रस्त ?
अनेक काण्डं क्यनाच्वंगु दु । देय्या शिक्षा ख्यःया प्राज्ञिक मर्यादा, विशुद्धता थौं संकटय् लानाच्वंगु दु । ध्यबाया आधारय् शैक्षिक लेनदेन, कारोबार जुयाच्वंगु दुःखद् घटनात पिहां वयाच्वंगु दु । अथे हे देय्या शान्ति सुरक्षाया निंतिं समर्पित जुइमाःगु प्रहरी संस्था दुनेया खँ न्यनेबलय् प्रत्येक जनताया नुगः थरथर खाइ ।
प्रहरीया गुलिखे भूतपूर्व उच्च पदाधिकारीत थौं भ्रष्टाचारया कारणं जेलवासी । अथे हे देय्या भ्रष्टाचारयात नियन्त्रित यायेत ‘अख्तियार दुरुपयोग अनुसन्धान आयोग’ गठन जुइ । तर थ्व संस्थां भ्रष्ट, भ्रष्टाचारीयात पनेगु ला गन भ्रष्टाचारीतय्त हे संरक्षण यायेगु संस्था जुयाः पिहां वइ । थनया आयुक्त हे खुंखार भ्रष्टाचारया नायके जुयाः खने दइ ।
देय्या अधिकांश संस्थातय् संचालन बाह्य हस्तक्षेप, माफियातय् इशाराय् संचालित जुइ । थौं अदालत थेंज्याःगु पवित्र व स्वतन्त्र जुइमाःगु संस्थाया हालत बेहाल जुइ । न्यायाधिशतय् योग्यता, जन्म मिति हे शंकास्पद जुइ । न्यायाधिशतय् नियुक्ति योग्यतां मखु, दलगत सिफारिसया आधारय् जुइ ।
देय्या संरक्षण, सुव्यवस्थाया जिम्मा कायेमाःपिं संस्था हे असुक्षम, भ्रष्ट, विवादग्रस्त जूसा देय् दीर्घरोगं ग्रस्त जुइगु स्वाभाविक खः ।
देशय् थौं दकलय् तःधंगु खतरा देय्यात यथार्थय् सुनां संचालन यानाच्वंगु दु । थ्व रहस्य सीकेमाःगु दु । देश देय्या सही सरकारया ल्हातय् लायेमाः ।
LEAVE YOUR COMMENTS