राजनीतिक दबाब मदुबलय् जूगु ज्या
बालेनया पुलिस मखु, नेपाल पुलिस खः । केपी ओलीयात नं ज्वनीम्ह पुलिस खः धाःम्ह कैलालीया डिएसपी प्रसन्नराज चौधरीं नुगः हे खँ ल्हाःगु खः । नेपालय् राजनीतिक दबाब व हस्तक्षेप मदयेकेगु खःसा पुलिसं नं ज्या याः, अदालतं नं ज्या याः धयागु खँ मंगलबाः भुटानी शरणार्थी प्रकरणय् जूगु फैसलां नं क्यना बिउगु दु । २०७८ साल चैतय् पीडिततसें उजुर तःबलय् ला शेरबहादुर देउवाया सरकार दुगु खः । २०७९ जेठं कान्तिपुरं समाचार च्वःबलय् नं व हे सरकार दुगु खः । लिपा पुष्पकमल दाहाल प्रचण्ड प्रधानमन्त्री जुयाः नारायणकाजी श्रेष्ठ गृहमन्त्री जूबलय् तिनि पुलिसं बालकृष्ण खाँण व टोपबहादुर रायमाझीयात ज्वंगु खः । आः बालेन साहया सरकार दुबलय् अदालतं फैसला यात ।
थ्व मुद्दाय् बालकृष्ण खाँण छम्ह ३० लाख तका धरौटी तयाः पिहां वल, मेपिंत थ्व छुट मबिउ । खाँण पिहां वयेफुगु हुनि नं केपी ओलीयात पुलिसपाखें लक्ष्मी कोइरी त्वःतके माःगु व शेरबहादुर देउवायात खाँण त्वःते माःगु जुयाः सहमति जूगु व ओलीं हे थःपिनि च्यानल छ्यःगु खँ नं पिहां वःगु हे खः । ओली व देउवाया थ्व साँठगाँठ लिपा प्रचण्डया सरकार क्वःथलाः केपी ओलीया सरकार वःगु खः धकाः धायेफु ।
खँ नगुने असार १५ गते या खः । शेरबहादुर देउवा व आरजु देउवा बालकोटय् केपी शर्मा ओलीया छेँय् धौबजि नयाः छुं छुं खँ ब्याकल धाल । वयांलिउ ला नेपाली कांग्रेसया समर्थनय् केपी शर्मा ओली प्रधानमन्त्री जुल । थीथी काण्डय् भकाभक मनू ज्वनाच्वंम्ह पुष्पकमल दाहालया पद चट् जुल । आपाःसिनं धाल- बालकृष्ण खाँण व टोपबहादुर रायमाझीयात ज्वनाः कुनाः छुं मपाः । तर व हे नक्कली भुटानी शरणार्थी प्रकरणय् बिचौलिया बेचन झायात ज्वसेंलि आरजु देउवाया नं पोल खुले यानाबिइगु जुल । थ्व हे एमालेया समर्थनय् दयेकातःगु प्रचण्ड सरकारया काल जुल । आः थ्व नक्कली भुटानी शरणार्थी प्रकरणय् येँ जिल्ला अदालतं फैसला न्यंकूसेलि थ्व खँ लुमंके बहः जूगु दु ।
औपचारिक रूपं हाई प्रोफाइल नेतात लाःगु अले गिरोह हे लगे जुयाः नेतात ल्हातय् कयाः राज्यया संरचनाया दुरुपयोग यानाः कुख्यात ज्या याःगु, नेताया काय्पिं हे कमाऊ धन्दाय् लगे जुयाः दलाली ज्या याःगु धकाः जक थुकिया प्रचार जूगु दु । तर थ्व केस ला हलिमय् हे गनं मदुगु सत्ता पक्ष व प्रतिपक्ष मिले जुयाः सरकार दयेकेगु ज्या जूगुया कारक नं खः । थुकिं पुलांगु पुस्ताया नेता धाक्व खुँ धइगु भाष्य तयार यात, पार्टीतय्गु बदनामी चरम रूपं जुल व जेनजी आन्दोलन मार्फत ने पाःया सत्ता परिवर्तनया निंतिं भूमिका तयार जुल ।
वंगु असार २३ गते मंगलवाः येँ जिल्ला अदालतया न्यायाधीश तेजबहादुर खड्का कसुर ठहर आदेश जारी यात । उगु आदेशय् सजाय तोके यानातःगु मदु । सजाय असार २९ गते जक तोके यायेगु धाल । थ्व नं न्हूगुकथंया हे खः । मुद्दा ठगी, कीर्ते, राज्यविरुद्धया अपराध व संगठित अपराध धकाः दु । वादी गजेन्द्र बुढाथोकीया जाहेरीं नेपाल सरकार व प्रतिवादी केशवप्रसाद दुलाल समेत धयातःगु दु । दुलाल छम्ह बिचौलिया जक मखु, थुगु केसया मास्टर माइन्ड खः ।
२०८० जेठ १० य् पूर्व उपप्रधानमन्त्री एवं एमाले नेता टोपबहादुर रायमाझी, पूर्व गृहमन्त्री एवं कांग्रेस नेता बालकृष्ण खाँण, तत्कालीन गृहसचिव टेकनारायण पाण्डे, पूर्व सांसद आङटावा शेर्पा व तत्कालीन गृहमन्त्री रामबहादुर थापाया सुरक्षा सल्लाहकार इन्द्रजित राईसहित ३० म्ह विरुद्ध किर्ते, ठगी, संगठित अपराध व राज्यविरुद्धया अपराधय् जिल्ला अदालतय् मुद्दा जूगु खः । भ्वं दयेकाः संगठित गिरोहया योजनाय् नेपाःमि नागरिकतय्त भुटानी शरणार्थी दयेकूगु दाबी अभियोग पतिइ दु । मास्टर माइन्ड केशव दुलाल, वया जहान दीपा हुमागाईं, मेम्ह बिचौलिया सानु भण्डारी व सन्देश शर्मा, गिरोहया नेटवर्कय् च्वनाः ज्या याःपिं टंककुमार गुरुङ, मोहनराज राई, निरञ्जनकुमार खरेल, केशव तुलाधर, बिचौलिया हरि भक्त महर्जन, वया जहान लक्ष्मी महर्जन, राजेश अर्याल, विनिता सावदेन लिम्बु, सागर राई, आशिष बुढाथोकी, सुनिल बुढाथोकी, रामशरण केसी, अशोक पोखरेल, गोविन्दकुमार चौधरी, धिरेन राई, बेचन झा व भुटानी शरणार्थी नेता टेकनाथ रिजाल विरुद्ध मुद्दा दायर जूगु खः ।
सैन्य विज्ञानय् पिएचडी याःम्ह डा. इन्द्रजीत राई थुज्वःम्ह मनू थुकी लाःगु खँय् आपाःसिनं दुःख प्वंकाच्वंगु दु । भूटानी शरणार्थी नेता जुयाः सकसियां समर्थन कयाच्वंम्ह टेकनाथ रिजाल लाःगु खँय् मनूत अजू चाःगु दु । रिजालं ध्यबा कालबिल याःगु खने मदुगु तर नक्कली कार्डय् सही याःगु धकाः फैसलाय् धयातःगु दु । टेकनाथ रिजाल न्ह्यःने दुबलय् आपाःसिनं गिरोहया मनूतय्त विश्वास याःगु नं खनेदत । आरोपित ३० म्ह मध्ये रामशरण केसी, टंकबहादुर गुरुङ, सन्दीप रायमाझी, लक्ष्मी महर्जन, प्रतीक थापा, केशव तुलाधर व आशिष बुढाथोकीं सफाइ काल । बिसिउँ वनाच्वंपिं अशोक पोखरेललिसें च्याम्हे सिया मुद्दा थाती तयेगु धाल ।
नेपालय् जनआन्दोलन जूबलय् भुटानय् नेपाली खँय् भाय् ल्हाइपिं हिन्दूतसें नं आन्दोलन यात । अनया भाय् जोङ्खा खः । बौद्ध धर्माबलम्बी खः । इमित सरकारी तवरं अने क नियम लागू यासेंलि च्वने मछुयाः भारतय् वल । भारतय् वःपिं भुटानी शरणार्थीतय्त भारतं हे ट्रकय् तयाः पानी ट्याङकी तक व काकरभित्ताया मेची खुसितक तयेहल । शरणार्थीत नं झापाया खुदुनावारी आदि थासय् पाल ग्वयाः टहरा दयेकाः च्वन । मुक्कं शरणार्थीतय्गु ल्याः १ लाख १३ हजार धइथें दु । शरणार्थी लित यंकेत नेपाः व भुटानया दथुइ तःक्व हे गृहमन्त्री स्तरय् वार्ता जुलं नं भुटानं शरणार्थीत लित मकाः ।
थ्व हे झ्वलय् अन युएनएचसिआरं नं ग्वाहालि यानाच्वंगु जुल । मेगु उपाय कथं स्वंगूगु मुलुकय् पुनस्र्थापन यायेगु खँ पिहां वःबलय् अमेरिका, क्यानाडा, अस्ट्रेलिया आदि देय्त तयार जुल । सन् २०१६ स थ्व कार्यक्रम बन्द जुल । बन्द जूबलय् ६५०० भुटानी शरणार्थी शिविरय् हे थात धकाः धाल । उमित छु यायेगु धइगु सवाल पिहां वःबलय् दकलय् न्हापां पहिचान यायेगु धकाः गृह मन्त्रालयया सहसचिव बालकृष्ण पन्थीया संयोजकत्वय् २०७६ जेठय् कार्यदल दयेकल ।
थ्व कार्यदलं नां तल धायेवं हे अमेरिका वने दइ धाःबलय् गिरोहया ज्या सुरु जूगु खः । थुगु कार्यदलया प्रतिवेदनय् हे गुलिखे नक्कली नां तयेगु ज्या जूगु खः । तर थथे यानाः गुलिसितं छ्वत, गुलिसित छ्वये मफुत । थुलितक जूबलय् छुं खँ पिहां मवः । तर लिपा ध्यबा कयाः छि अमेरिका झाये खनीगु जुल बधाई दु धकाः धाःम्ह मनू लिपा सम्पर्कविहीन जुल । अथे जुसेंलि ध्यबा बियाः अलपत्रय् लाःपिं मनूत मुनाः २०७८ सालया चैतपाखे पुलिसय् उजुरी तसेंलि थ्व काण्ड सार्वजनिक जूगु खः । थुकी ८७५ म्ह मनूतय्के म्हतिं १० लाख तका निसें ५० लाख तका तक काःगु व २८ करोड ध्यबा उठे याःगु खँ दु ।
थ्व सवालय् टोपबहादुर रायमाझीपिं थःपिं थुनामुक्त जुइमाः धकाः उच्च अदालत व सर्वोच्च अदालतय् वंबलय् धरौटीइ त्वःते त अस्वीकार यात । बालकृष्ण खाँणयात जक ३० लाख तका धरौटी कयाः त्वःतल । पदय् च्वंपिं मनूतसें अधिकार दुरुपयोग याःगु खँय् अख्तियार दुरुपयोग अनुसन्धान आयोग व हाकुगु धन मुंकूगु खँय् सम्पत्ति शुद्धीकरण विभाग नं थ्व केसय् वयाच्वंगु दु । दकलय् गृह मन्त्रालयया मनू हे कीर्ते काइते ज्याय् संलग्न जूगु धयागु मछालापुसे च्वंगु खँ खः । अन्तर्राष्ट्रिय लागाय् हे नेपाःया बदनामी जुइगु खँ खः । थुकिं चार्ल्स शोभराजं ने पाःया भन्सारं किसि नं पास यायेफु धकाः धाःगु खँ सही साबित जूगु दु । नक्कली भुटानी शरणार्थी प्रकरणय् आरजू देउवा व केपी ओलीया पीएमार्फत ओलीया खँ पिहां वःसां पुलिसं हे अनुसन्धान मन्ह्याकूसा अदालतं थीगु खँ मजुल । तर गुलि जुल, उकियात सकारात्मक धकाः हे धाये माः । आः असार २९ गते छु सजाय तोके याइगु खः व धाःसा स्वये मानि ।
LEAVE YOUR COMMENTS