लिभरपुल, चेल्सी स्तब्ध, बार्सिलोना बराबरीइ

च्याम्पियन्स लिगया म्हिगः चान्हय् जूगु कासाय् डिफेन्डिङ्ग च्याम्पियन लिभरपुल लिसें चेल्सी स्तब्ध जुइमाःगु दुसा बार्सिलोना धाःसा पराजयपाखें बचे जूगु दु । थगुनेया च्याम्पियन लिभरपुलयात इटलीया नेपालीं २–० गोलं स्तब्ध याःबलय् प्रिमियरशीपय् लिभरपुलया मू प्रतिद्वन्द्वीप चेल्सीं नं स्पेनिस क्लब भ्यालेन्सियापाखें १–० गोलं बचे जुल ।

मेखे बार्सिलोना धाःसा गोलकिपर मार्क अन्डर टेर स्टेगनं पेनाल्टि पनाबिउगुलिं जर्मन क्लब बोरुसिया डर्टमनलिसे बराबरी यायेत ताःलात ।
नेपोलीया घरेलु मैदानय् जूगु लिभरपुललिसेया रोमाञ्चक कासाय् ८१ मिनेट तक निगुलिं टिमं गोल यायेमफुगु खः । ८२ औं मिनेटय् ड्रिएस मेर्टिन्सं घरेलु टिमया निंतिं न्हापांगु गोल यात ।

लिभरपुलया एन्ड्रिउ रोबर्टसनं पेनाल्टि बक्सय् जोसे कोलेहनयात फल तयेवं वःगु पेनाल्टिइ मेर्टिन्सं न्हापांगु गोल याःगु खः ।मेगु गोल इन्जुरी इलय् जुल । कासाया ९२ औं मिनेटय् फर्नान्डो लोरेन्टें गोल यासें लिभरपुलयात स्तब्ध यानाबिउगु खः । लोरेन्टे थगुनेया फाइनलय् टोटनह्याम पाखें लिभरपुलविरुद्ध म्हितूम्ह कासामि खः ।

थगुने लिभरपुलपाखें पराजित जूगुलिं लोरेन्टें च्याम्पियन्स लिगया उपाधी ल्ह्वनेमखन ।मेखे गोलकिपर स्टेगनं डर्टमन्डया कप्तान मार्को रिउसया पेनाल्टियात उत्कृष्ट बचाउ याःगुलिं बार्सिलोनां गोलरहित बराबरी यासे पराजयपाखें बचे जुल । कासाजःछि डर्टमन्ड बार्साविरुद्ध तःगू हे आक्रमण याःगु खः ।

तर गोलकिपर स्टेगनं उत्कृष्ट बचाउ यानाच्वंगुलिं गोल यायेमफुत । कासाया ५७ औं मिनेटय् बार्साया नेल्सन सेमेडों डर्टमन्डया जेडन सान्चोयात क्वःदयेकेवं पेनाल्टि बिउगु खः । कप्तान रिउसं थ्वाःगु बलयात स्टेगन पूवंक डाइभ यासें बचे याःगु खः । थ्व कासाय् बार्साया १६ दँ दुम्ह कासामि अन्सु फातीं न्हूगु कीर्तिमान तःगु खः ।

व १६ दँ ३२१ न्हु दुकुन्हु मैदानय् कुहां वसें बार्सापाखें च्याम्पियन्स लिग म्हितूम्ह दकलय् चीधिकःम्ह कासामि जूगु दु । छुं न्हि न्ह्यव ला लिगय् गोल यासें बार्साया निंतिं गोल याःम्ह दकलय् चिधिकःम्ह कासामि नं जूगु खः । निगूगु हाफय् फातिया थासय् लिओनल मेसी मैदानय् दुहां वःगु खः । चोटया कारणं आराम यानाच्वंपिं मेसीं सिजनया न्हापांगु च्याम्पियन्स लिग कासाय् थःगु उपस्थिति क्यनमफुत ।

चेल्सी धाःसा थःगु घरेलु मैदानय् हे भ्यालेन्सियापाखें १–० गोलं पराजित जूगु खः । प्रिमियर लिगय् बांलाःगु कासा न्ह्यब्वयाच्वंम्ह मिडफिल्डर मेसन माउन्ट कासाया सुरुइ हे चोट लानाः मैदानं पिहां वनेवं चेल्सी दबाबय् लाःगु खः ।

अय्सां भ्यालेन्सियायात दबाबय् तयाच्वंसां भ्यालेन्सियाया रक्षापंक्ति त्वाःथले मफयेवं अःखतं पराजय फयेमाल । कासाया ७४ औं मिनेटय् ड्यानियल पारेजोया फ्रिकिकय् रोड्रिगों गोल यासें भ्यालेन्सियायात अग्रता बिउगु खः । थ्व हे छगू गोल चेल्सीया पराजयया निंतिं कुगात ।

सम्बन्धित बुखँ

LEAVE YOUR COMMENTS