एशिया कप छनोट नेपाःया न्हापांगु विजयी

येँ – एशिया कप छनोट क्रिकेटय् नेपालं न्हापांगु विजय चूलाकूगु दु । शनिवाः जूगु कासाय् नेपालं मलेसियायात १९ रनं बुकूगु खः । मलेसियाया घरेलु मैदान ओभल क्रिकेट मैदानय् जूगु कासाय् नेपालं न्हापां ब्याटिङ यासें मलेसियायात १८९ रनया लक्ष्य बिउगु खः । तर मलेसियां निर्धारित ३० ओभरय् ९ विकेटया क्षतिइ मुक्कं १६९ रन जक दयेकेत ताःलाःगु खः ।

नेपाःया निंतिं बसन्त रेग्मीं स्वंगू, सोमपाल कामी व सन्दीप लामिछानें निगू निगू व सागर पुन व दीपेन्द्र सिंह ऐरीं छगू छगू विकेट काःगु खः । मलेसियाया निंतिं मोहम्मद अनवरं ३४, सैद अजिज मुवारकं ३४, अहमेद फैज नुरं २२, भिरनदीप सिंंहं २१, मोहम्मद रम्लीं १३ व सरभिन मनियान्डीं झिगू रन जक दयेकूगु खः ।

थ्वयां न्ह्यः न्हापां ब्याटिङ याःवःगु नेपाःयात निर्धारित ३० ओभरय् १८८ रन दयेकेगु झ्वलय् दीपेन्द्र सिंहं ऐरी व अरिफ शेषं अधसतक दयेकल । नेपाःया निंतिं कप्तान पारस खड्कां १३, अनिलकुमार साहं १६, दिपेन्द्र सिंह ऐरीं ५४, ज्ञानेन्द्र मल्लं ११, अरिफ शेषं अविजित ६४ रन दयेकूगु खः । कासाय् दीपेन्द्र सिंह ऐरी म्यान अफ द म्याच जूगु खः ।

कासा सुरु जुइ न्ह्यव सुथय् तसकं वा वःगुलिं कासा ३० ओभरय् सीमित याःगु खः । नेपाः थ्वयां न्ह्यः ओमान व युएइलिसे पराजित जुइधुंकूगु दु । नेपालं आइतवाः सिंगापुर लिसे म्हिती ।