स्वयेबहपिं कासामि एन्जेल (डि मारिया व इडिसन काभानी)

एन्जेल डि मारिया, मिडफिल्डर, अर्जेन्टिना

अर्जेन्टिनाया मिडफिल्डर एन्जेल डि मारिया लेफ्ट विंगर खः । ३० दँ दुम्ह डि मारिया गोल यायेत व गोल यायेगु निंतिं ह्वःताः चूलाके फुम्ह कासामि खः । सन् २००८ निसें डि मारिया अर्जेन्टिनाया निंतिं म्हिता वयाच्वंगु दु ।
पेरिस सेन्ट जर्मेनया कासामि डि मारिया स्पेनिस क्लब रियल म्याड्रिड व प्रिमियरशीप क्लब म्यानचेस्टर युनाइटेडपाखें नं म्हिते धुंकूम्ह खः ।

ब्राजिलय् जूगु विश्वकप फाइनल व सेमिफाइनल चोटया कारणं म्हिते मखंम्ह डि मारिया थ्व पालय् फाइनलय् म्हितेगु खःसा उच्च प्रदर्शन यायेमाःगु दु ।

डि मारियां म्हिताच्वंगु थ्व स्वंगूगु विश्वकप खः । थ्व विश्वकपया छनोटया निंतिं जूगु फुक्क कासा म्हितावःम्ह वयात फाइडियो नं धायेगु याः ।

इडिसन काभानी, फरवार्ड, उरुग्व

इडिसन काभानी फ्रेञ्च क्लब पेरिस सेन्ट जर्मेनया फरवार्डर खः । थ्व सिजनय् काभानीं थःगु क्लबया निंतिं ४८ गू कासा म्हिताः ४० गोल यायेधुंकूगु दु । फरवार्डर काभानी सन्२००८ य् उरुग्वेया सिनियर टिमय् डेब्यु याःगु खः । कोलम्बिया नाप जूगु थःगु न्हापांगु कासाय् हे वं गोल याःगु खः ।

सुरुइ झिंगूगु कासा म्हिताः छगू जक गोल याःम्ह काभानी थौंकन्हय् धाःसा उरुग्वेया अप्वः गोल याःम्ह कासामि जुइधुंकूगु दु । वं आः १०४ गू कासा म्हिताः ४२ गोल यायेधुंकूगु दु।

थ्व विश्वकपय् नं वं छगू गोल यायेधुंकूगु दु । थ्व विश्वकपय् इडिसनं रसिया विरुद्ध न्हापांगु गोल याःगु खः ।