स्कुलय् नं न्यूनतम पारिश्रमिक अनिवार्य याकेगु प्रतिबद्धता

येँ – श्रम, रोजगार व सामाजिक सुरक्षामन्त्री गोकर्ण विष्टं फुक्कं क्षेत्रय् ज्या याइपिं श्रमिकतय्त सामाजिक सुरक्षा व न्यूनतम पारिश्रमिक अनिवार्य यायेगु खँ धयादीगु दु । नेपाल शिक्षक महासंघया ग्वसालय् जूगु छगू ज्याझ्वलय् न्ववासें वय्कलं सामुदायिक व निजी स्कुलय् ज्या याइपिं शिक्षक व कर्मचारीतय्त नं सामाजिक सुरक्षाया प्रत्याभुति बियाः न्यूनतम पारिश्रमिक कार्यान्वयन याकेगु प्रतिबद्धता प्वंकादीगु खः ।

‘शिक्षकतय्सं सुथय् १० निसें ४ बजे तक ब्वंकेगु याइ, तर उचित पारिश्रमिक धाये काये खनाच्वंगु मदु’ धासें मन्त्री विष्टं धयादिल, ‘आः थ्व अवस्था न्ह्याबलें जुयाच्वनी मखु । सरकारं न्यूनतम ज्यालाया प्रत्याभुति याकी, न्यूनतम पारिश्रमिक कायेमखंपिं शिक्षक व विद्यालय कर्मचारीयात पारिश्रमिक बीकेगु निंतिं मन्त्रिपरिषद्य् सहलह जुयाच्वंगु दु ।’

आः नं गुलिखे सामुदायिक विद्यालयय् ज्या यानाच्वंपिं शिक्षक व कर्मचारीतय्सं नं सरकारं तोके यानातःगु न्यूनतम पारिश्रमिक काये खनाच्वंगु मदुनि । उमिसं लय् निद्वः तकां तकं ज्या यानाच्वंगु गुनासो वयाच्वंगु खँ न्ह्यथँसें मन्त्री विष्टं श्रीम ऐन व योगदानय् आधारित सामाजिक सुरक्षा ऐनया प्रावधान कार्यान्वयनय् हयेगु प्रतिबद्धता प्वंकादीगु खः ।

महासंघया अध्यक्ष बाबुराम थापां नेपाःया राजनीतिइ आन्दोलनय् शिक्षकतय् भूमिका महत्वपूर्ण दुगु खँ न्ह्यथँसें शिक्षक व कर्मचारीतय्त छुं नं कथंया शोषण जुइमजिउगु खँय् बः बियादिल । निजी स्कुलय् ब्वंकीपिं शिक्षकतय् आर्थिक अवस्था तसकं दयनिय जूगु धासें वय्कलं फुक्क ख्यलय् श्रम ऐन कथं न्यूनतम पारिश्रमिक व सामाजिक सुरक्षा लागु यायेमाःगु खँय् बः बियादिल ।