पुँजी वृद्धि मयाःपिंत बीमा समितिया स्पष्टीकरण

येँ – बीमा समितिं निर्देशन बियातःकथं चुक्ता पुँजी मथ्यंकूपिं कम्पनीतय् कारोवार रोक्का याइगु जूगु दु । थुकिया निंतिं समितिं पुँजी मथ्यंकूपिंत न्हय्न्हुया दुने कारण सहित उपस्थित जुइत निर्देशन बिउगु दु । सोमवाः च्वंगु बीमा समितिया संचालक समितिया बैठकं पुँजी मथ्यंकूपिं स्वदेशी लगानीया बीमा कम्पनीतय्के स्पष्टीकरण कायेगु क्वःछिउगु खः ।

बैठकं बीमा ऐन २०४९ कथं छाय् कारवाही मयायेगु धयागु स्पष्टिकरण सहित लिखित लिसः कायेगु क्वःछिउगु खः । पुँजी जुटे यायेगु म्याद तःक्वः थप यायेधुंकाः नं पुँजी थ्यंकेत मानेम जूपिं कम्पनीतय्सं चित्त बुझे जूगु कारण मबिल धाःसा कारवाही प्रक्रिया न्ह्याकीगु जूगु दु । थ्व कारवाही प्रक्रिया कथं पुँजी मथ्यंकूपिं कम्पनीतय् कारोवार तकं रोक्का याइगु जुइ ।

समितिं जीवन बीमा व निर्जिवन बीमा निगुलिं कम्पनीयात स्पष्टीकरण काःगु खः । समितिया बैठकं पुँजी थ्यंकेगु निंतिं हाकनं ई थप मयायेगु नं क्वःछिउगु खः । आःतक जीवन बीमापाखे सूर्या लाइफ, गुराँस लाइफ, प्राइम लाइफ, राष्ट्रिय बीमा संस्थां बीमा समितिया निर्देशन कथं पुँजी अप्वयेकूगु मदुनि ।

अथेहे निर्जीवन पाखे एनएलसी, युनाइटेड, प्रडेन्सियल, लुम्बिनी जनरल व राष्ट्रिय बीमा कम्पनीं पुँजी मथ्यंकूनि । राष्ट्रिय बीमा संस्थानया थःगु हे ऐन दुगुलिं संस्थानयात धाःसा बीमा समितिं पुँजी अप्वयेकेत निर्देशन मबिउ । संसदय् पेश यानातःगु बीमा प्राधिकरण ऐन मवःतले बीमा संस्थान थःगु हे ऐन कथं संचालन जुइ ।

सम्बन्धित बुखँ

LEAVE YOUR COMMENTS