थप २५ गते विद्युतीय बस हइगु

येँ – प्यंगः बसपाखें नेपालय् न्हापांखुसी विद्युतीय बस संचालन याःगु सुन्दर यातायातं थ्व हे दँय् मेगु २५ गः बस थप याइगु जूगु दु । वंगु महिना तिनि सुरु जूगु बस नाफाय् वनेवं बस थप यायेगु योजना दयेकूगु खः । डिजेलं चले जुइगु बस औसत खुक्वः तक चक्रपथ चाःहिलीबलय् न्हिं प्यद्वः तका इन्धनय् खर्च जुइ ।

विद्युतीय बसय् धाःसा औसत ७५० तका खर्च दःसा गाः । वंगु महिना निसें चक्रपथय् प्यंगः बस संचालनय् हयेगु कम्पनीं आः बस थप यायेगु योजना दयेकूगु खः । थौंकन्हय् चक्रपथय् हे संचालन जुयाच्वंगु बस न्हूगु बस वयेवं नगर दुने व स्वनिगलं पिने नं संचालनय् हयेगु योजना दुगु खँ प्रालिया अध्यक्ष भेषबहादुर थापां धयादिल ।

वय्कलं २५ गः बस मध्ये गुलिं बस प्रदेश नं. १ व ५ य् नं संचालन जुइगु खँ कनादीगु दु । प्रदेश नं. ५ य् बुटवल–नेपालगञ्ज रुटय् संचालन जुइसा प्रदेश नं. १ य् काँकडभित्ता–विराटनगर रुटय् संचालन जुइ । ‘प्रदेश नं. १ या मुख्यमन्त्री नं विद्युतय् बस संचालनय् उत्सुक दु’ वय्कलं धयादिल, ‘ प्रदेश सरकारलिसे सहकार्य यानाः वइगु स्वला दुने बस सञ्चालनय् वइ ।’

आः संचालनय् वयाच्वंगु व मेगु दयेकाच्वंगु बसया डिजाइनय् नेपाली प्राविधिक नं संलग्न जुयाच्वंगु खँ अध्यक्ष थापां धयादिल । युरोपय् चले जुइथेंज्याःगु बस झीथाय्यागु सतकय् उपयुक्त मजुइगुलिं थनया सतक लिसे मिले जुइ कथं बस डिजाइन जुयाच्वंगु खँ वय्कलं कनादिल । बस स्वनिगःया सतकय् चले यायेत उपयुक्त जूगु खँ वय्कलं धयादिल ।

गुलिखेसिनं सतक गाः वंथाय् व पाखाय् चले यायेत थाकुइ धाःसां अज्याःगु समस्या मवःगु खँ नं वय्कलं धयादिल । ब्याट्रिइ लः लान धाःसा समस्या जुइफुगु खँ धासें वय्कलं धयादिल, ‘सतकय् लःया मात्रा अप्वः जुलकि डिजेलया गाडीइ इन्जिनय् समस्या वइसा विद्युतीय बसय् ब्याट्रिइ समस्या जुइ ।’

आः सञ्चालनय् वयाच्वंगु व वइगु दिनय् नेपालय् दुहां वइगु बस आधुनिक व सुविधासम्पन्न जुइगु खँ नं वय्कलं धयादीगु दु । बसय् स्वंगः एयर कन्डिसन, न्हय्गः सिसिटिभी दइ । बसय् ध्यबा पुलेबलय् नं मोबाइलपाखें हे प ुलेफइ । ‘यात्रुत बसं कुहां वनेबलय् बिल कायेदइ, उगु बिलय् यात्रु गःगु व कुहां वःगु नं उल्लेख जुइ’ वय्कलं धयादिल ।

विद्युतीय बस न्यायेत थिकेसां संचालन खर्च म्हो जुयाच्वंगु खँ अध्यक्ष थापां धयादिल । मतया ध्यबा नं देशं पिहां मवनीगु जूगुलिं कम्पनीं आः सरकारं क्वःछिनातःगु भाडादरय् २० प्रतिशत छुट नं बियाच्वंगु दु । सरकारया विद्युतीय सवारीसाधन प्रोत्साहन यायेगु नीति कथं मूल्य अभिवृद्धि करय् छुट बीमाःगु वय्कःया माग दु ।

वय्कलं धयादिल, ‘सरकारं करय् छुट बिल धाःसा जिमिसं यात्रुतय्त अझ अप्वः छुट बीफु ।’आः सञ्चालनय् वयाच्वंगु बसया क्षमता ४० व ३५ सिटया खः । ४० सिटया छगः बस न्यायेगु निंतिं छगू करोड ६२ लाख तू । अथेहे ३५ सिटया बसया भाः १ करोड ५२ लाख तू । थ्व बस छगः पूवंक चार्ज यायेत ६० निसें ८० मिनेट लगे जू ।

सरकारया नीति व कार्यक्रमय् विद्युतीय सवारीसाधनयात प्रोत्साहन यायेगु लक्ष्य दुसां व स्वयां न्ह्यव हे थःपिंसं बस न्यायेगु व संचालन यायेगु तयारी यानागु खँ नं वय्कलं कनादिल ।सरकारया नीति दयेकाच्वंगु दु धयागु जानकारी वःगु भरय् योजना दयेकागु जूसां यक्व निकाययात थुइकेत मफुगुलिं बस दर्ता व रुट कायेत सहज मजूगु खँ वय्कलं धयादिल ।

निला न्ह्यव प्रधानमन्त्री केपी ओलीयात नापलानाः थुकिया जानकारी बीधुंकाः जक वय्कलं दर्ता प्रक्रिया न्ह्याकेत निर्देशन बियादिउगु खः ।
कम्पनीं आः बस संचालन यायेत अनुमति कायेफुसां न्हूगु संस्थायात वयेत अझं सहज मजुनिगु खँ नं अध्यक्ष थापां धयादिल । सरकारं अझं चार्जिङ स्टेशनया निंतिं मतया महसुल निर्धारण याःगु मदुनि ।

सरकारं विद्युतीय बसयात प्रोत्साहन जुइकथं कार्यक्रम हयेमाःगु खँय् वय्कलं बः बियादिल । वय्कलं धयादिल, ‘विद्युत प्राधिकरसणं ऊर्जाया खपत अप्वयेकेगु धयाच्वंगु इलय् विद्युतीय बस प्रोत्साहन यायेगु लक्ष्य सरकारं हयेमाः ।’साझाया बस न्यायेगु प्रक्रिया न्ह्याःमवन
सरकारं साझा यातायात पाखें न्यायेगु धयातःगु स्वसःगः बस न्यायेगु प्रक्रिया धाःसा न्ह्याः वनेमफुनि ।

भौतिक पूर्वाधार तथा यातायात मन्त्रालयं वंगु असारय् हे विद्युतीय बस न्यायेगु निंतिं साझाया स्वंगू अर्बया शेयर न्याःसां अपेक्षाकृत रुपं प्रक्रिया न्ह्याः मवंगु मन्त्रालयं धाःगु दु ।मन्त्रालयं साझा यातायातलिसे बस न्यायेगु प्रक्रियाय् जुयाच्वंगु ढिलाइ बारे न्यनेकने यानाच्वंगु खँ प्रवक्ता राजेश्वर ज्ञवालीं धयादिल ।

विद्युतीय बस न्यायेगु लागि स्वंगुलिं तहया सरकारं साझाया शेयर न्यायेगु खः । नेपाल सरकारं स्वंगू अर्ब, प्रदेश नं. ३ सरकारं ३० करोड, येँ महानगरपालिकां १० करोड व यल महानगरपालिकां २ करोड ५० लाखया शेयर न्याःगु खः ।

सम्बन्धित बुखँ

LEAVE YOUR COMMENTS