उच्च प्रतिफल बीगु आयोजना मालेगु ज्या अन्तिम चरणय्

नेपाःमितय्त जलविद्युत आयोजनाया शेयरधनी दयेकीगु

येँ – सरकारं हरेक नेपाली नागरिकतय्त जलविद्युत आयोजनाया शेयरधनी दयेकेगु लक्ष्य तयाः ३५०० मेगावाट क्षमताया जलविद्युत आयोजना दयेकेगु प्रक्रिया न्ह्याकूगु दु । ‘नेपाःया लः, जनताया लगानी’ धयागु मू नारा बियाः सकलें नेपालीतय्त लगानीकर्ता दयेकेगु व दीर्घकालिन रुपं आर्थिक उपार्जनया माध्यम दयेकेगु लक्ष्य तयाः थुगु अवधारणा न्ह्यःन हःगु खः ।

नेपाःया सकलें २ करोड ८० लाख नागरिकतय्त आयोजनाया शेयरधनी दयेकेगु, उकिं हे आर्थिक समृद्धिया निंतिं लँ चायेकेगु लिसें लगानीयोग्य ध्यबा मालेत उखेथुखे जुइमाःगु अवस्थाया अन्त्य यायेगु धकाः थुगु अवधारणा न्ह्यःने हःगु खः । ऊर्जा, जलस्रोत व सिँचाइमन्त्री वर्षमान पुनं उच्च प्रतिफल बीगु व आकर्षक आयोजना मालेगु ज्या अन्तिम चरणय् थ्यंगु खँ धाःगु दु ।

वय्कलं धयादिल, ‘सकलें नेपाःमिपिंसं शेयरय् लगानी यायेफइ कथं आवश्यक व्यवस्था यायेत धितोपत्र बोर्ड व मेमेगु सरोकारवाला निकायलिसे सहलह जुइधुंकल, छु मोडालिटीइ, गुकथं लगानीया सुनिश्चितता यायेगु धयागु विषय छुं न्हि लिपा हे क्वःजिइगु जुइ ।’सकसिनं लगानी यायेफइगु वातावरण दत धाःसा आयोजना दयेकेबलय् थःगु हे धयागु भावना दइगु व ज्या यायेत नं सहज जुइगु सरकारया बिचाः दु ।

थौंकन्हय् निजी ख्यःया जलविद्युत आयोजनातय्सं नं स्थानीयवासीयात १० प्रतिशत व आम सर्वसाधारणयात १५ प्रतिशत शेयर बीगु याना वयाच्वंगु दु । थ्व व्यवस्थाया कारणं जलविद्युत आयोजना दयेकेत जिल्ला व स्थानीय निकायय् आर्थिक उपार्जनया थप माध्यम नं जूवंगु दु । चिलिमे जलविद्युत आयोजनाया कारणं रसुवावासी आर्थिक रुपं सम्पन्न जूगु हे नेपाःया निंतिं सफल उदाहरण जूगु दु ।

सरकारं वइगु स्वदँया दुने ३५००, न्यादँ दुने ५००० व झिदँ दुने १५ हजार मेगावाट मत उत्पादन यायेगु लक्ष्य तयातःगु दु ।

‘जिमिसं यक्व प्रतिफल बीगु व आकर्षक व याकनं दयेके क्वचाइगु आयोजनाया धलः दयेकागु दु । उकी नेपाःमितय्सं म्होतिं नं ४९ प्रतिशत शेयर तयेफइ । थुकिं सरकारं नालाकाःगु समृद्ध नेपाल, सुखी नेपालीया संकल्प नं पूवंकेत सहज जुइ’ मन्त्री पुनं धयादीगु दु । सरकारं न्हापांगु चरणय् ३७ मेगावाट क्षमताया माथिल्लो त्रिशुली थ्री बी, १०० मेगावाटया तामाकोशी न्यागूगु व ४८ मेगावाट क्षमताया भेरी बबइ डाइभर्सन आयोजनाय् नेपाःमितय्त लगानीया लागि आह्वान यायेगु तयारी यानाच्वंगु दु ।

आकर्षक आयोजनाया छनोट, लगानीया मोडालिटी मालेगु व स्थानीयवासीयात नं सहभागी दयेकेबलय् आयोजना निर्माणय् सहजता दइगु सरकारं थुइका वयाच्वंगु दु ।सरकारं वइगु स्वदँया दुने ३५००, न्यादँ दुने ५००० व झिदँ दुने १५ हजार मेगावाट मत उत्पादन यायेगु लक्ष्य तयातःगु दु । थ्व लक्ष्यायात पूवंकेत फुक्क कथंया उपाय मालेगु ज्या जुइगु खँ मन्त्री पुनं धयादीगु दु ।

करिब ४ हजार मेगावाट क्षमताया आयोजना निर्माणया चरणय् दुगुलिं वइगु स्वदँ दुने ३५०० मेगावाट मत उत्पादन यायेगु सरकारया लक्ष्य धाःसा पूवनीगु खनेदु । अथेहे न्यादँया निंतिं क्वःछिनातःगु लक्ष्य नं पूवनीगु खनेदु । चालु आवया अन्त्यतक ४५६ मेगावाट क्षमताया माथिल्लो तामाकोशी आयोजना दयेके क्वचाइ । अथेहे चिलिमेया सहायक कम्पनी दयेकाच्वंगु स्वंगू आयोजना नं क्वचाइ ।

चिलिमेया सहायक कम्पनीतय्सं १११ मेगवाटाया रसुवागढी, १०१ मेगावाटया भोटकोशी व साञ्जनेया निगू ४२.५ व १४.८ मेगावाटया आयोजना दयेकाच्वंगु दु । माथिल्लो तामाकोशीं नं वइगु कात्तिक तकया दुने सर्वसाधारणया निंतिं साधारण शेयर पितबीगु तयारी यानाच्वंगु दु । अथेहे साञ्जेन व रसुवागढीं नं साधारण शेयर पितबीगु तयारी यानाच्वंगु दु ।

नेपाःया सुं नं नागरिक जलविद्युत आयोजनाया शेयरपाखें बञ्चित मजुइमा धयागु ल्याखं सरकारं आवश्यक तयारी यानाच्वंगु मन्त्री पुनया धापु दु । थ्वहे दथुइ नेपाल विद्युत प्राधिकरणया महत्वाकांक्षी परियोजना कथं जुयाच्वंगु माथिल्लो जलविद्युत आयोजनाय् नं शेयर पितबीगु तयारी जुयाच्वंगु दु । थ्व आयोजनायात कम्पनी ढाँचाय् दयेकेत वंगु शुक्रवाः जक मन्त्रिपरिषद् बैठकं स्वीकृति बिउगु दु । थ्व आयोजना थ्यंमथ्यं १००० मेगावाटया आयोजना खः ।