बार्साया विजयय् झिंखुदँया फातिया गोल

झिंखुदँया फरवार्ड अन्सु फातिं ला लिगाय् सिनियर टिमं म्हितूगु निगू मिनेट दुने हे गोल यायेवं बार्सिलोनां भ्यालेन्सियायात ५–२ गोलं बुकूगु दु । टिनएजर फातिं फ्रांकी डि जोंगया पासय् बार्साया निंतिं खाता चायेकाबिउगु खः । थ्वयां न्यागू मिनेट लिपा हे फातिं पलेसा पुलेकथं पास मिले यानाबीवं जोंगं ७ औं मिनेटय् गोल याःगु खः ।

थ्व लिपा कासाया २७ औं मिनेटय् केभिन गामिइरों भ्यालेन्सियाया गोल यासें कासाय् लिहां वयेगु कुतः याःगु खः । तर निगूगु हाफय् जेर्राड पिकं छगू व लुइस स्वारेजं निगू गोल यानाबीवं भ्यालेन्सियां बांमलाक पराजय फयेमाःगु खः । पिकं निगूगु हाफ सुरु जूगु खुगू मिनेटय् छगू गोल यातसा स्वारेजं ६१ औं व ८२ औं मिनेटय् छगू छगू गोल यात ।

भ्यालेन्सियाया निंतिं म्याक्सि गोमेजं इन्जुरी इलय् छगू सान्त्वना गोल याःगु खः । बार्सिलोनाया ला मासिया एकेदेमिइ ब्वलंम्ह फाति बार्साया निंतिं गोल याःम्ह दकलय् ल्याय्म्हम्ह कासामि खः । वंगु महिनाय् ओसासुना लिसे जूगु कासाय् नं फातिं मैदानय् दुहां वःगु खुगू मिनेट दुने गोल यानाबिउगु खः ।

ला मासिया एकेदेमिइ २०१२ य् दुहां वःम्ह फातिं खुदँ दुबलय् हे थःगु देय् गुनिया बिसाउं स्पेन दुहां वःम्ह खः ।म्हिगःया कासाय् बार्साया सुपरस्टार लियोनल मेसी धाःसा चोटया कारणं मैदान पिने च्वनाः स्वया जक च्वंगु खः ।

सम्बन्धित बुखँ

LEAVE YOUR COMMENTS