युएईयात बुकाः नेपाः विश्वकप छनोटय् दुहां वन

येँ (नेपालभाषा टाइम्स)- आइसिसी विश्वकप लिग २ या बिहिवाः जूगु कासाय् युएईयात बुकाः नेपाः तप्यंक विश्वकप छनोटय् दुहां वंगु दु । त्रिवि मैदानय् जूगु कासाय् नेपालं डकवर्थ लेविसया आधारय् युएईयात निगू रनं बुकूगु खः ।

मौसम बांमलानाः खिउँया वःगुलिं कासा दिकाः डकवर्थ लेविस आधारय् कासाया निर्णय याःगु खः । कासा त्याकेगु निंतिं युएई बिउगु ३११ रनया विशाल लक्ष्य ज्वनाः म्हिताच्वंगु नेपालं ४४ ओभरय् ६ विकेटया क्षतिइ २६९ रन दयेकूगु इलय् द्यः खिउँया वयाः म्हितेमफइगु जूगुलिं कासा दिकाः डिएल नियमया आधारय् कासाया निर्णय याःगु खः । थ्व इलय् नेपाःया निंतिं ५० रन दयेकेधुंकूम्ह गुलझन झा व १० रन दयेकाः दीपेन्द्र ऐरी क्रिजय् दुगु खः ।

नेपाःया विजयया निंतिं भीम सार्किं ६७ रन, आरिफ शेखं ५२ रन, कुशल भुर्तेलं ५० रन, कप्तान रोहित पौडेलं १६ रन व कुशल मल्लं ५ रनया योगदान बिउगु खः । युएई निंतिं जुनैद सिद्धिकं स्वंगू विकेट काःगु खः ।

मेखे टस त्याकाः न्हापां ब्याटिङ याःगु युएई ५० ओभरय् ६ विकेटया क्षतिइ ३१० रन दयेकूगु खः । एकदिवसीय क्रिकेटय् नेपाःविरुद्ध दयेकूगु थ्व आःतकया दकलय् उच्च योगफल खः । युएईया निंतिं आसिफ खानं ४२ बलय् १०१ रनया अविजित पारी म्हितूगु खःसा वृत्य अरबिन्दं ९४ रनया योगदान बिउगु खः ।

नेपाःया निंतिं दीपेन्द्रसिंह ऐरीं २, ललितनारायण राजवंशी, सोमपाल कामी व सन्दीप लामिछानें छगू छगू विकेट काःगु खः ।