अमेरिकायात छुँतय् हाथ्या

अमेरिका संसारय् शक्तिशाली राष्ट्रमध्ये छगू खः । थ्व खँय् सुयां निगू मत दइमखु । यदि अमेरिकां इच्छा यात धाःसा न्ह्यागु देशय् नं प्रतिबन्ध तयेफु । आतंकवादी व इमिगु संगठनया निंतिं ला अमेरिका दकलय् छ्यं स्याःगु विषय हे जुल । उकिं सुनानं अमेरिकाय् आक्रमण याये न्ह्यः सछिक्वः स्वयां अप्वः विचाः याइ ।

विश्वया थ्व हे शक्तिशाली देय् धाःसा थौंकन्हय् छुँ खनाः ग्यानाच्वंगु दु । अमेरिकायात धाथें थ्व इलय् हाथ्या बी फुपिं सुं दुसा व मेपिं सुं मखु, छुँ हे खः । थौंकन्हय् अमेरिकां छुँतय् आतकया सामना याये मालाच्वंगु दु । अमेरिकाय् थुकथं छुँतय्सं आक्रमण न्यंकाच्वंगु विषययात कयाः सामाजिक संजालय् अमेरिका हास्यया पात्र जुयाच्वंगु दु ।

अमेरिकाया राजधानी वाशिंगटनय् दकलय् अप्वः छुँतय्सं आक्रमण यानाच्वंगु दु । थनया गल्लि, सतकय् छुँत आनन्दं चाःहिलाच्वंगु दुसा उखे नसाज्वलं मालेगु नसात्वँसा ज्वलं तयातःगु थलबलय् जःखः नं तसकं फोहर जुइक छुँतय् पुचः पुचः हे खने दयाच्वंगु दु । छुँतय्गु ल्याः थुभनं अप्वया च्वंगु दु कि इमित नियन्त्रणय् कायेत तकं समस्या जुयाच्वंगु दु ।

छगू समाचारकथं हरेक ५ फिट तापाक वनेवं छम्ह छुँ खने दयाच्वंगु दुसा राष्ट्रपति निवासय् नं छुँतय् बथां उलि हे दु । राष्ट्रपति निवासय् छुँतय् बथां खंगु घटनायात कयाः ‘फक्स न्यूज’या छम्ह पत्रकारं याःगु ट्विट थ्व इलय् तसकं चर्चित जुयाच्वंगु दु ।
अमेरिकाय् थुकथं छुँतय् आतकं खने दुगु थ्व न्हापांखुसी धाःसा मखु, थ्व स्वयां न्ह्यः सन् २०१५ या इलय् नं न्यूयोर्कय् सहरय् छुँतय्सं तःधंगु हे आतंक न्यंकूगु खः ।

सम्बन्धित बुखँ

LEAVE YOUR COMMENTS