प्रधानमन्त्री जोनसनया विकल्प

बेलायत युरोपेली संघं पिहां वयेगु खं थौंकन्हय् प्रधानमन्त्री बोसिर जोनसन संकटय् दु । प्रधानमन्त्री ला छु ब्रेक्जिटया खँ थौंकन्हय् बेलायत हे अन्योलय् दु । छखे प्रधानमन्त्री छुं नं हालतय् बेलायत युरापेली संघं अक्टोवर ३१या क्वःछिनातःगु ई दुने हे पिहां वयेमाः धयागु अडानय् दुसा बेलायती संसद धाःसा बिना सम्झौता युरोपेली संघं पिहां वयेमजिउ धयागु पक्षय् दु ।

तर संसदं युरापेली संघं पिहां वयेगु निंतिं प्रधानमन्त्रीतय्सं तयाच्वंगु छुं हे प्रस्तावयात स्वीकृति नं बियाच्वंगु मदु । जोनसन स्वयां न्ह्यः प्रधानमन्त्री टेरिजा में हःगु युरोपेली संघं पिहां वनेगु प्रस्ताव नं संसदं स्वीकृत मयाः । थ्व हे कारणं में थःगु पद त्वःते मालसा व धुंकाः ब्रेक्जिटया झन कट्टर समर्थक जोनसन प्रधानमन्त्री जुल ।

प्रधानमन्त्री जोनसन थौंकन्हय् छुं नं हालतय् ब्रेक्जिट क्वचायेकेगु निंतिं नीति÷कुनीति फुक्क लागु यानाच्वंगु दु । ब्रेक्जिटया हे निंतिं जोनसनं बिना सम्झौता ब्रेक्जिटया प्रस्ताव यानादिल । थुकिं मजिया ई न्ह्यव हे मध्यावधी चुनावया यायेगु प्रस्ताव यात, संसद्यात हे अनिर्णयया बन्दी दयेकेगु निंतिं संसदयात निलम्बन यात ।

तर वय्कःया थ्व छुं नं कुतः धाःसा सफल जुयाच्वंगु मदु । तर वय्कःया थ्व छुं हे कुतः धाःसा सफल मजुल । संसदय् ब्रेक्जिटयात कयाः प्रधानमन्त्रीया प्रस्ताव जक असफल याःगु मखु मध्यावधी चुनावया प्रस्ताव नं अस्वीकार यानाबिल । थुकिया निंतिं वय्कःया कन्जर्भेटिभ पार्टीया हे सांसदतय्सं वय्कःयात साथ मबिल ।

मेखे संसद निलम्बनया खँय् नं स्कटल्याण्डया उच्च अदालतं गलत निर्णय धकाः फैसला न्यंकेधुंकूगु दु । आः थ्व मामिला सर्वोच्च अदालतय् थ्यनेच्वंगु दु । थ्व हे दथुइ संसदं धाःसा ब्रेक्जिटया क्वःछिनातःगु ईयात लिछ्यायेगु सम्बन्धी छगू विधेयक हे पारित यायेधुंकूगु दु । थ्व विधेयक कथं आः प्रधानमन्त्री जोनसनं अःखबतं संघया अध्यक्षयात नापलानाः ब्रेक्जिटया समयसीमा ३१ अक्टोवरं लिछ्यायेगु निंतिं इनाप यायेमाःगु जूगु दु ।

तर प्रधानमन्त्री जोनसन धाःसा थुकिया पक्षय् द हे मदु । जोनसनं ब्रेक्जिटया ई लिछ्यायेगु स्वयां ला थः गालय् कुतुं वनाः सीत तयार दु तकं धयाच्वंगु दु । छुं नं हालतय् संघं बेलायतयात पित हयेमाः धकाः कुतः यानाच्वंम्ह प्रधानमन्त्री जोनसनयात संसदया तःधंगु दबाब दुसां अझ नं वय्कःयाके छुं छुं विकल्प ल्यं दनिगु खँ राजनीतिक विश्लेषकतय्सं यानाच्वंगु दु ।

गथेकि संसद्ं पारित याःकथं ब्रेक्जिटया क्वःछिनातःगु ई लिज्याकेगु निंतिं युरापेली संघयात इनाप यायेत अस्वीकार यायेगु व थ्व कानुनयात पालना मयासे ३१ अक्टोवरय् संघं पिहां वयेगु । थुकिया लिसें युरोपेली संघयात ई लिछ्यायेत इनाप ला यायेगु तर संघय् दुथ्याःगु मेगु छुं देय्यात बेलायतया इनापयात अस्वीकार यानाः भिटो लगे यायेत इनाप यायेगु मेगु विकल्प नं प्रधानमन्त्री जोन्सनयाके दु ।

अथेहे आःयात संसद्य् पारित जूगु विधेयक कथं संघयात ब्रेक्जिटया ई लिछ्यायेत इनाप ला यायेगु तर ३१ अक्टोवर त्यइ थे च्वंकाः हाकनं मेगु छपु पौ च्वयाः जिमित ३१ अक्टोवर हे ठीक जू, उबलय् हे ब्रेक्जिट याःसां जिउ धायेगु । प्रधानमन्त्री जोनसनया इच्छा कथं छुं नं हालतय् ब्रेक्जिट यायेगु खःसा वय्कःयाके थज्याःगु छुं छुं विकल्प ला ल्यं दनि, तर थुकी वय्कः थःम्हेसित नं यक्व खतरा धाःसा दु ।

यदि वय्कलं पारित जूगु विधेयक कथं कानुन पालना मयासें बलजफ्ति हे समयसीमा कथं ३१ अक्टोवरय् ब्रेक्जिट घोषणा यात धाःसा लिपा कानुनी झन्झट फयेमालेफु । थुकी वय्कः कानुन पालना मयाःगु द्वपनय् जेल तकं लायेफु ।अथेहे न्हापां ई लिछ्यायेत पौ च्वयाः लिपा हाकनं ई लिछ्यायेम्वाल धकाः युरापेली संघयात पौ च्वःसां युरोपेली संघं प्रधानमन्त्री जोनसनयात हरेक इनापयात स्वीकार हे याइ धयागु मदु ।

प्रधानमन्त्रीं चाहे जूसां संसद् पारित जूगु ब्रेक्जिटया ई लिछ्यायेगु विधेयक कथं युरापेली संघयात ई लिछ्यायेत पौ च्वये मखु धकाः अस्वीकार नं यायेफु । तर थुकी नं प्रधानमन्त्रीं लिपा वनाः कानुनी झमेला फयेमालेफु । गुगु आः तुरन्तया निंतिं थज्याःगु झमेला फयेत प्रधानमन्त्री जोन्सन तयार मदु जुइमाः ।

प्रधानमन्त्री कार्यालयं नं जोनसनया कानुन पालना मयायेगु छुं सोच मदुगु खँ धायेधुंकूगु दु । मेगु विकल्प कथं युरापेली संघया छुं छगू दुजः देय्यात ई लिछ्यायेगु बेलायती प्रस्ताव अस्वीकार यानाः भिटो लगे यायेत इनाप यायेगु खँय् नं छुं नं देश तुरुन्त प्रधानमन्त्रीं धाःकथं भिटो लगे यायेत तयार हे जुइ धयागु अवस्था मदु ।

पोल्यान्डलिसें छुं पूर्वी युरोपया देय्त ब्रेक्जिटया पक्षय् दुसां उमिसं नं तुरुन्त हे भिटो लगे याइ धयागु मदु । उमित नं आः थथें भिटो लगे याःसां लिपा जोनसन प्रधानमन्त्री मजुल धाःसा वयेफुगु समस्या बारे बिचाः यायेमाःगु जुइ ।ब्रेक्जिटया खँय् तःधंगु अन्योलय् लानाच्वंगु बेलायतय् आः थथें छुं जुइ धयागु धायेफुगु अवस्था मदुनि ।

प्रधानमन्त्री जोनसनयाके नं ब्रेक्जिटया निंतिं छुं खतरापूर्ण विकल्प ला दु, तर थ्व विकल्प मध्ये वय्कलं छु नाली धायेफुगु मदुनि । वय्कलं नं ब्रेक्जिटय् सहमति यायेमफयेवं राजीनामा नं बीफु । उकिं आः थथें ब्रेक्जिटया खँय् छुं जुइ धायेफुगु अवस्था मदुनि ।

सम्बन्धित बुखँ

LEAVE YOUR COMMENTS