‘बुक फ्रि फ्राइडे’ ज्याझ्वलं ब्वँमिपिनिगु ज्ञानया दायरा अप्वःगु दु – उपप्रमुख डंगोल

येँ (नेपालभाषा टाइम्स)÷येँ महानगरपालिकाया उपप्रमुख सुनिता डंगोलं ‘बुक फ्रि फ्राइडे’ ज्याझ्वलं ब्वँमिपिनिगु ज्ञानया दायरा अप्वःगु खँ धयादीगु दु । बालुवाटारय् च्वंगु महेन्द्र माध्यमिक विद्यालयय् ‘बुक फ्रि फ्राइडे’ (पुस्तकविहीन शुक्रवाः) ज्याझ्वःया क्रियाकलाप निरीक्षण लिपा वय्कलं उकथंया प्रतिक्रिया बियादीगु खः ।

उपप्रमुख डंगोलं निरीक्षणया झ्वलय् ब्वँमिपिंलिसे खँल्हाबल्हा यानादिसें थ्व स्वयां न्ह्यः सयेकागु सीप, ज्ञान व ब्वँमिपिंत जूगु अनुभवया बारे नं जानकारी कयादीगु खः । ‘बुक फ्रि फ्राइडे’ ज्याझ्वः अन्तर्गत सीपमूलक विषयय् ९० घन्टाया प्लम्बिङया तालिम पूवंकूपिं विद्यार्थीतय्त उपप्रमुख डंगोलं ‘थःगु छेँय् स्यनाच्वंगु हिति दयेकेगु ज्या यानागु दु ला?’ धकाःन्ह्यसःतयादीगु खः ।

उकिया लिसलय् ब्वँमिपिंसं ‘न्हूगु छेँ वा भवन दयेकाच्वंगु खनीबलय् उकिया प्लम्बिङया ज्या थम्हं यायेफु’ धइगु महसुस जूगु प्रतिक्रिया बिउगु खः । ब्वँमिपिनिगु खँ न्यनाः उपप्रमुख डंगोलं ‘बुक फ्रि फ्राइडे’ ज्याझ्वः अन्तर्गत शिक्षाय् सीप सयेकेगु ज्याझ्वःपाखें थःपिंसं थुकथंया हे अपेक्षा यानागु प्रतिक्रिया बियादीगु दु । ‘थ्व छगू जक विधाया खँ जुल, मेमेगु विधाय् नं ब्वँमिपिनिगु आत्मविश्वास अप्वया वन धाःसा इमिसं माध्यमिक तहया शिक्षा पूवंके धुंकाः थःत उद्यमशीलताया निंतिं योग्य जूगु महसुस याये फइ’, वय्कःया धापू दु ।

उपप्रमुख डंगोललिसें ४ वडाअध्यक्ष दिनेश महर्जन, येँ महानगर शिक्षा विभागया प्रमुख सीताराम कोइराला लगायतया पुचलं ब्वनेकुथिइ निरीक्षण यायेत वंगु इलय् ब्वँमिपिं हुलाप्याखं, सिलाई बुनाई, चित्रकला, पाककला लगायत थीथी क्रियाकलापय् व्यस्त जुयाच्वंगु खः ।

अथे हे ब्वनेकुथिया कम्प्युटर ल्याबय् चिचिधिकःपिं मस्त मचा बाखंया लिधंसाय् तयार यानातःगु संकिपा स्वयाच्वंगु खःसा च्वय्या तगिंया ब्वँमिपिं ब्वनेकुथिया सभाकक्षय् राजनीतिक पृष्ठभूमिइ निर्माण यानातःगु ‘सेतो बाघ’ संकिपा स्वयाच्वंगु खः । उपप्रमुखलिसे दोहरो संवाद यायेगु झ्वलय् ब्वँमिपिंसं स्थानीय त्वाः, थाय्बाय्, सार्वजनिक महत्वया थाय्, न्ह्यसःलिसःकासा आदि क्रियाकलाप बारे थःपिनिगु अनुभव कंगु खः ।

अवलोकन लिपा वडाअध्यक्ष महर्जनं ब्वँमिपिं व्यावहारिक सिकाइप्रति उत्साहित जूगु धासें ब्वँमिपिंके खने दुगु थ्व उत्साह समुदायय् तक थ्यंके फत धाःसा स्थानीय मस्तय्त नं लबः दइगु धारणा तयादिल । विभागया प्रमुख कोइरालां सीप शिक्षाय् प्लम्बिङया ९० घन्टाया तालिम पूवंकेधुंकूगु धासें न्हापांगु चरणय् ८० गू पुचःयात तालिम बियागु व थुकियात निरन्तरता बिया वनेगु जुइ धयादिल ।