
नीदँ न्ह्यः येँय् वनेत ख्वपं वयेगु इलय् जःखः छखा निखा छेँ दनेगु सुरु जूगु खः । हाइवे जःखः प्लटिङ व निर्माण ज्या न्ह्यानाच्वंगु ई । थौं ख्वप व येँ स्वाये धुंकूगु दु । पीदँ न्ह्यः चक्रपथ निर्माण जूगु इलय् सतक जःखः हरियाली प्रबद्र्धन यायेगु थाय् तयाः उब्जा जुइगु जग्गा कब्जा याःगु इलय् गुलिं जग्गाधनीत नये तकं मखना आत्महत्या तकं यायेमाःगु अवस्था वल धाइ ।
थौं चक्रपथया जःखः छकू जग्गा तकं थाय् ल्यं मदयेक पिनेया मनूत वयाः च्वने धुंकूगु दु । आः हाकनं स्वनिगः दुने हे न्हूगु शहर दयेकेगु वा स्मार्ट शहर दयेकेगु धकाः पिनेया मनूत तम्से जुया वयाच्वंगु दु । मोहनी व स्वन्ति नखः जुइगु इलय् सुनसान जुइगु वा शान्त जुइगु थ्व थासय् मेगु इलय् छाय् थथे अपार भीड, अस्तव्यस्त व गाडीया चापया कारणं घण्टौंतक जामया सामना याये मालाच्वंगु खः, थ्व खँय् छक्वः विचाः यायेमाःगु दु ।
पंचायती सरकारं गाउँ फर्क राष्ट्रिय अभियान चले याःसां गां गामं स्वनिगः दुने मनूत दुत हयेगु प्रक्रिया मत्वःतू । प्रजातन्त्र लिपा प्रजातान्त्रिक सरकारं आफ्नो गाउँ आफँै बनाऔं अभियान न्ह्याकल नं झन् अप्वः गामं मनूत शहर वा येँय् दुहां वयेगु क्रम अप्वः जुया वल । बाहिरी चक्रपथया धारणा न्ह्यब्वयाः थनया जःखः न्हूगु शहर स्थापनाया कल्पना नापनापं पीगू लाख मनूत थप येँय् दुहां वइगु सम्भावना अप्वया वनाच्वंगु दु ।
स्वनिगः दुने च्वंपिं रैथाने नेवाःत फगत न्यागू लाख जक खः । स्वनिगलं पिने हे अप्वः न्यागू खुगू लाख नेवाःत च्वनाच्वंगु दु । थ्व ल्याखं बरु नेवाःत थःगु आदिभूमि त्वताः बाध्यतां पिने वनाः अन हे स्थापित जुयाच्वंगु दु । तर थन वःपिं खस ब्राम्हणतय्सं स्वनिगः दुने न्ह्याथे यानाः नं थःगु छकूचा थाय्बाय् दयेकाः लिपा थनं पिने पलाः तयेत मवनेगु नीति अबलम्बन यानाच्वंगु दु ।
थ्व धइगु थन झन् झन् अस्तब्यस्त शहरया अवधारणा विकास यानाः थ्व थासय् चोरी, डकैटी, बलात्कार, हिंसा व फोहर नापं प्रदूषण अप्वयेकेगु जक काइदा खः । थुकिं थ्व स्वनिगः न्हापा थें सुन्दर, शान्त व अलकापुरी जुइगु छुं हे सम्भावना मदु । उगु अलका लित हये फइगु अवस्था जुइ हे मखुत ।
सरकार खस ब्रम्हुतय् ल्हाःतय् दु । राज्य यन्त्र चले याइपिं नं फुक्कं फुक्कं उपिं हे खः । अथे जुयाः आः हे नं थन खँय् ब्रम्हुतय्सं थ्व देय्यात छु धाल अथे याये फयाच्वंगु दु । थ्व राजधानी शहर येँयात माल धाःसा उमिसं थःपिनि पेवा वा क्वसः हे दयेकेगु स्वयाच्वंगु दु ।
खस ब्राम्हणतय्सं स्वनिगः दुने न्ह्याथे यानाः नं थःगु छकूचा थाय्बाय् दयेकाः लिपा थनं पिने पलाः तयेत मवनेगु नीति अबलम्बन यानाच्वंगु दु । थ्व धइगु थन झन् झन् अस्तब्यस्त शहरया अवधारणा विकास यानाः थ्व थासय् चोरी, डकैटी, बलात्कार, हिंसा व फोहर नापं प्रदूषण अप्वयेकेगु जक काइदा खः ।
मल्ल कालय् तक शाह वंशं थनया सांस्कृतिक बैभवयात ध्वाथुइकेगु ल्याखं छुं अतिक्रमण याये मफयाः थनया फुक्कं जात्रा पर्व चले यायेत ग्वाहालि यानाच्वंगुलि आः धमाधम उगु नेवाः बैभवशाली संस्कृति न्हंकेगु, स्यंकेगु व क्वत्यलेगु ज्या यानाच्वंगु दु । थ्व छगू नेवाः जति बिरुद्धया गम्भीर अपराध नं खः ।
तर थन नेवाः जाति स्वयमं हे उगु षडयन्त्र वाः चायेके मफयाच्वंगु कारणं वर्तमान सरकारं आः मेगु न्हूगु स्मार्ट सिटी स्वनिगः दुने तयार यानाः उकि हाकनं पिनं वइपिं गैर नेवाः वा खस ब्रम्हुतय्त हे बसोबासया अवसर दयेकेगु कुतः यानाच्वंगु दु । आः धाःसा उगु खँ नेवाःत थारा न्हुइकाबिउगु दु ।
आः हे थन अस्तब्यस्त स्थिति कायम जुयाच्वंगु दु । येँय्नं कार्यालय ई स्वयाः ख्वप वा यल तक वने माल धाःसां घण्टौं घण्टातकं जाम जुयाच्वंगु दु । थथे जाम, सतक दुर्घटना, चोरी, अपराध व डकैटया घटना न्हिया न्हिथं अप्वयाच्वंगु दु । अप्वः धइथें न्हूगु बस्ती थज्याःगु घटना अप्वः जू ।
छगू हे क्वथाय् मिजं मिसा सिनाच्वंगु लुइगु नं ग्वंगःबुं बसपार्क, बालाजु चोक, कलंकी थेंज्याःगु नेवाः बस्तीयात अतिक्रमण यानाः पिनं वःपिं च्वनेत वःगु थासय् अप्वः खने दयाच्वंगु दु । पिनं वःपिसं अप्वः खुइगु यानाच्वंगु दु । पुुलांगु थासय् स्वयाः म्हमसिउपिं च्वनीगु थासय् अप्वः अपराधिक घटना जू ।
थ्व ल्याखं थनया शान्ति सुब्यवस्था कायम यायेगु खःसा न्हापां राजधानी येँय्नं पिने तये यंके हथाय् जुइधुंकूगु दु । स्वनिगःयात कला व संस्कृतिया राजधानी कायम यानाः थनं पिने हे जक उद्योग, कलकारखाना, ब्यापार ब्यवसाय व होटेल स्थापना यानाः पर्यटकतय्त वने वयेत तसकं हे अःपुइगु ज्या यायेगु खत धाःसा सरकारया भिजिट नेपाल २०२० ताःलाइ ।
मखुत धाःसा सरकारं स्मार्ट सिटीया अवधारणा हयाः न्हूगु शहर निर्माणया डीपीआर तकं तयार यानाः थनया अपराध, हत्या, हिंसा व चोरी डकैटीया मात्रा म्हो यायेगु कल्पना यथार्थय् मखु दिवास्वप्न धइथें जक जूवनेफु ।स्वनिगः थाय् पिनेयापिं मनूतय् निंतिं न्हूगु चीज खः । थनयापिसं थनया बारे गुलि सिउ । पिनेयापिसं उलि सिइगु खँ हे मन्त ।
उकिं थ्व थाय्बाय् गथे यायेमाः, छु यायेमाः व छु जुयाच्वंगु दु धइगु भुक्तभोगीत थनया रैथाने नेवाः जातिया न्ह्यलुवात हे जक खः । उकिं थनया गुथि, जग्गा, जमीन व कला, संस्कृतिया उन्नति व विकास यायेगु नं थनयापिं मनूतय्सं हे अप्वः स्यू । थनयापिसं थनया बारे मसिउ धायेगु व झापाया केपी ओली, इलामया झलनाथ खनाल व सुवास नेम्वाङ अले ताप्लेजुङया योगेश भट्टराईनं नेवाः जातिया दुःख कष्ट सिउ धायेगु मिले हे मजू ।
उकिं नेवाः बुद्धिजीवीतय्सं थन छु यायेमाः धइगु धारणा न्हापां न्ह्यब्वया क्यनेमाः । राजनीतिक क्षेत्रय् नं न्ह्यलुवा नेवाः अले सचेत राजनीतिज्ञ नारायणमान बिजुक्छेँ रोहितं धाःथें याकनं फक्वः याकनं आः नं दाङ उपत्यकाय् केन्द्रीय राजधानी ल्ह्ययाः येँ देय्या सांस्कृतिक गौरवयात म्वाका तये फत धाःसा हे जक नेवाःत थौं गुलि थःगु जातिया गौरव तायेका म्वाये फयाच्वंगु खः, कन्हय् नं उगु गौरवयात ल्यंके फयाच्वनी ।
मखुत धाःसा आः हे क्वत्यलेत वःपिं खस ब्रम्हुतय्गु बाहुल्यता येँ वा स्वनिगः दुने दया वनेवं कन्हय् उपिं पिने ला वनी हे मखु । बरु झी थनया नेवाः जातियात बाध्य यानाः थ्व थासं पितिना फुसा देसं हे पिने तये यंकेगु वा दार्जिलिङ, सिक्किम थेंज्याःगु नेवाःतय्त सुख, सुविधा बियाः वा स्थानीय राज्य सरकारं तकं मान्यता बियातःगु थासय् ह्याउँगु कार्पेट लाया नं तये यंकेफु ।
LEAVE YOUR COMMENTS