नेपाल मजदुर किसान पार्टीया ४७ दँ
थौं स्वयां ४७ दँ न्ह्यः माघ १० गते नेपाल मजदुर किसान संगठनया नामं नेपालय् छगू वाम घटकया स्थापना जुल । देसय् बहुदलीय प्रजातन्त्र स्थापना जुइ न्ह्यःतक थुगु संगठनं भूमिगत रुपं थःपिनि गतिविधि झिंन्यादँ संचालन यात। उगु इलय् गबलें पंचायती चुनावयात उपयोग यानाः नगर पंचायत कब्जाय् कायेगु, नगर पंचायतय् कम्युनिष्ट झण्डा ब्वयेकेगु, पंचायत नामं पत्रिका पिथना उकी लेनिन, स्टालिन, माक्र्स, ऐगेल्सया रंगीन किपात कभर पेजय् हे पिथनेगु थेंज्याःगु अवैध ज्यात नेमकिसं मार्फत् जुल । उकिं तत्कालीन नेमकिसं पंचायती ब्यवस्थाया मिखाय् कँ हे सावित जुल । देसय् २००४ सालं नीस्वंगु नेपाली कांग्रेस व २००६ सालय् नीस्वंगु कम्युनिष्ट पार्टीं तकं यायेमफुगु ब्यवस्थाया लागिं अवैधानिक ज्यात तत्कालीन नेमकिसंपाखे जूगु खनेदु। उकिं त्वह मदु त्वह तयाः स्थापनाया झिंन्यादँ बुदिं हनाच्वंगु इलय् ख्वपय् थःपिंसं हे त्याकातःम्ह छम्ह जनप्रतिनिधियात स्यात धइगु त्वह तयाः नेमकिसंया नेता कार्यकर्तातय्त ज्यान मुद्दा लगे यानाः १९ महिना कुनाबिल । खय् तला अबलय् ६७ म्ह ह्योजू हत्यारातय्त फाँसी बीकथं पंचायती ब्यवस्थां मुद्दा तःगु खः । तर पंचायत थः हे समूल नष्ट जुइवं उगु गुरुयोजना कार्यान्वयन याये मफयावन।
थौं नं भक्तपुर काण्ड धाइगु उगु कर्णप्रसाद ह्योजूया हत्या याःगु द्वपं फयाः जेल नेल सजाय फःपिं नेतात ख्वप नगरया मेयर, वडाअध्यक्ष नापं नेताकथं म्हसीका बियाच्वंगु दु। २०३१ सालं नीस्वंगु पार्टीं नं थुकथं पंचायती ब्यवस्थाया समूल नष्ट यायेत तःधंगु ग्वाहालि व भूमिका म्हितल धायेगु इलय् भचा पत्याः याये थाकुथें च्वनी । तर खँ अथे मखु। २०४५ सालय् भक्तपुर काण्ड जुयाः अबलय्या नेमकिसंया नेता कार्यकर्तात सेन्ट्रल जेल, भद्रबन्दी गृह व नख्खु कारागारय् जेलजीवन हनाच्वंगु इलय् हे भारतीय पक्षं निगू देय् दथुइया पारवहन सन्धी क्वचाल धकाः देशय् नाकाबन्दी यानाबिल । उकिया विरोध यानाः जेलय् वःपिं विद्यार्थी नेता मार्फत् पंचायती ब्यवस्थायात सखाप याये मफुतले नेपाःया राजनीतिक पार्टीतय्सं थःपिनि गतिविधि स्वतन्त्र रुपं याये मफइगु खँ थीथी पार्टीया नेतातय् न्हाय्पनय् थ्यंकेगु ज्या जुल । वयां लिपा २०४६ साल फागुन ७ गतेनिसें देसय् जनआन्दोलनया लहर वःगु खः । थुकिं भक्तपुर काण्ड नं छगू ल्याखं आन्दोलन यायेत मार्ग प्रशस्त यायेगु ज्याय् ग्वाहालि जूवंगु घटना खः । २०४५ भाद्र ५ गते सुथय् ५ बजे जूगु इलय् तःभुखाय् ब्वयेवं ख्वपय् नं आपालं मनूत सित। छेँ नं दुना वल । उकियात भिंकेगु व राहत वितरण यायेगु ज्याय् पंचायती ब्यवस्थाया छुं नं पदय् मदुम्ह व अबलय् सरकारं धाःथें सीडिओ मार्फत् जक वितरण याये दइगु प्रणालीयात तकं उल्लंघन यानाः ख्वपय् पूर्व राष्टिय पंचायत सदस्य कर्णप्रसाद ह्योजूयात मार्वारी सेवा समितिपाखें बीगु क्वाति, कम्बल व जाकिया कुपन इनेत छ्वयाहःगु खः । पंचायती प्रधानमन्त्री मरिचमान श्रेष्ठं थुकथं ख्वपय् संगठित रुपं न्ह्यःने खने दयाच्वंगु नेपाल मजदुर किसान संगठनयात दने तकं मफयेक क्वत्यलेगु उपायकथं षडयन्त्रपूर्ण रुपं छगः हे गोलीं निम्ह झंगः शिकार यायेगु काइदाकथं ह्योजूयात छ्वयाहल । उकी वं पक्षपातपूर्ण कुपन वितरण यानाः जनआक्रोश ब्वलंकेगु ज्या यात ।
स्थापनाया झिंन्यादँ बुदिं हनाच्वंगु इलय् ख्वपय् थःपिंसं हे त्याकातःम्ह छम्ह जनप्रतिनिधियात स्यात धइगु त्वह तयाः नेमकिसंया नेता कार्यकर्तातय्त ज्यान मुद्दा लगे यानाः १९ महिना कुनाबिल । खय्तला अबलय् ६७ म्ह ह्योजू हत्यारातय्त फाँसी बीकथं पंचायती ब्यवस्थां मुद्दा तःगु खः । तर पंचायत थः हे समूल नष्ट जुइवं उगु गुरुयोजना कार्यान्वयन याये मफयावन ।
सुयां हे मयःम्ह व जनताया मिखाय् धोकेबाया रुपय् प्रचार जुयाच्वंम्ह मनूपाखें पक्षपातपूर्ण राहत वितरण याये धुंकाः वयात सजाय बीगु, देय् चाःहिकेगु लगायतया योजना दयेकूगु खः । तर व हे दुर्गतीया ज्या ज्यान काण्ड लिपा वनाः भक्तपुर काण्ड जूवन । लिपा पंचायती ब्यवस्थाया अन्त्य व बहुदलीय प्रजातान्त्रिक ब्यवस्थाया उदय नापं २०४७ साल बैशाखं भक्तपुर काण्डय् संलग्न धाःपिं सकसिगुं मुद्दा लित कयाः ससम्मान जेल मुक्त यात। थ्व घटना लिपा पपु ध्यनातःम्ह झंगः थें नेमकिसंपाखे छुं छुं गतिविधि बाहेक देय्या राजनीतिइ महत्वपूर्ण भूमिका म्हिते मफुत। वयां लिपा २०४७ सालय् भैरहवाय् राष्ट्रिय सम्मेलन यानाः नेमकिसंया नां नेपाल मजदुर किसान पार्टी (नेमकिपा) तयेगु घोषणा जूगु खः । थुखे मार्क्सवादी व माक्र्सवादी लेनिनवादी जानाः नेकपा (एमाले) गठन जूथें नेमकिसं नं नेमकिपा जुल । २०४८ सालय् न्हापांखुसी जूगु बहुदलीय आम निर्वाचनय् नेमकिपां जुम्ला व ख्वपया क्षेत्र नम्बर १ य् त्याकाः २०५ म्ह सांसदय् निम्ह सांसद त्याकल । थज्याःगु ज्यां राजनीतिक व मौलिक अधिकार बचे यायेगु ज्याय् सदन व सतकय् तकं नेमकिपापाखें ज्या यानाच्वन । लिपा २०५१ सालया मध्यावधि निर्वाचन जूगु इलय् नेमकिपां जुम्लां भक्तबहादुर रोकाया, दैलेखं विनोदकुमार शाहनापं ख्वप क्षेत्र नम्बर २ पाखें आशाकाजी बासुकला व ख्वप क्षेत्र नम्बर १ पाखें पार्टी अध्यक्ष नारायणमान बिजुक्छेँ रोहित यानाः प्यम्ह सांसद त्याकूगु खः ।
थुकथं २०३१ सालय् नीस्वनाः २०४७ सालय् जक खुल्ला जूगु पार्टीं थौं थःपिनि स्थापनाया ४७ दँ बुदिं हनाच्वंगु दु। थ्व अवधिइ प्रतिनिधिसभाया निर्वाचनय् त्याःपिं प्यम्हमध्ये भक्तबहादुर रोकाया नेपाली कांग्रेसय् वनाः वन मन्त्रीतक जूगु स्वयेमाल । न्हापां त्याकूम्ह जुम्लाया दिल्लीबहादुर महत नं एमालेय् वनाः लिपा मृत्युवरण याःगु स्वयेमाल । विनोदकुमार शाह नं एमाले प्रवेश याःगु स्वयेमाल । नापं ख्वप क्षेत्र नम्बर २ पाखें त्याकूम्ह थःपिनि सांसद आशाकाजी बासुकलां नं मृत्युवरण याःगु स्वयेमाल । उलि जक मखु पार्टी गतिविधियात देय् न्यंकं थ्यंकेगु हे झ्वलय्आ पालं दुःख कष्ट सिउपिं नेतात तंके मालाच्वंगु दु। गुलिं थःपिनि मनय् तयाथें प्रतिबद्ध जुयाः ज्याय् लगे जुइगु पलेसा मेगु पार्टी नापं सतिनाः उगु पार्टीया छुं उच्च पदय् थ्यंकूगु आपालं दसु खने दयाच्वंगु दु। उकिं थौं थुगु पार्टीं पार्टीयात थःपिनिगु मनय् तयाथें तःधं यायेगु स्वयां नं सुदृढ यायेगु ज्याय् अप्वः ई बियाच्वंगु दु। मेमेगु कम्युनिष्ट पार्टीयात मार्ग निर्देशन यायेगु ज्याय् लगे जुयाच्वंगु दु। उकिं नं माधव नेपाल प्रधानमन्त्री जूसां, डा. बाबुराम भट्टराई प्रधानमन्त्री जूसां वा प्रचण्ड व केपी ओली प्रधानमन्त्री जूसां छक्वः नेमकिपाया अध्यक्ष नारायण बिजुक्छेँ नाप लानाः परामर्श यायेगु चलन धाःसा निरन्तर रुपं जुयाच्वंगु दनि। थ्व छगू ल्याखं बांलाःगु राजनीतिक संस्कार नं खः । देसय् परिपक्व राजनीतिक नेता माले माल धाःसा थौं नेमकिपाया अध्यक्ष नारायणमान बिजुक्छेँयात हे सकसिनं लुमंकेगु यानाच्वंगुलिं ४७ दँया देन मधाःसें मगाये धुंकल ।
LEAVE YOUR COMMENTS