ढाकाय् मिं च्यानाः झिद्वः स्वयां अप्वः मनूत घरबार बिहीन

येँ – बंगलादेशया राजधानी ढाकास्थित सुकुम्बारी बस्तीइ वंगु शुक्रवाः चान्हय तसकं मिं च्यानाः झिद्वः स्वयां अप्वः मनूत घरबार बिहीन जूगु दु । ढाका लिकसं मिरपुरय् शुक्रवाः चान्हय् मिं नयाः थ्यंमथ्यं निद्वः छेँय् खरानी जूगु अग्नि नियन्त्रण विभायाया एर्साद हुसेनं
कनादीगु दु ।

बस्ती दुने चिया पसः चले याना वयाच्वंगु अब्दुल हमिदं थम्हं छगू नं सामान पिने पिकाये मफुगु खँ कनादीगु दु । मिखाय् ख्वबि जायेक तयाः वय्कलं धयादी, ‘जिगु छुं हे मन्त, आः छु यायेगु जुइ ?’अग्नि नियन्त्रकपिंसं ताः ई तक कुतः यानाः मि नियन्त्रणय् काःगु खः । उगु घटनाय् मानवीय क्षति धाःसा मजूसां छुं मनूत सामान्य घाःपाः धाःसा जूगु दु ।

सुकुम्बासी बस्तीय म्हो आय दुपिं तयारी पोशाख उद्योगय् ज्या याइपिं मजदुरत च्वनाच्वंगु खः । मुस्मां समुदायया महत्वपूर्ण नखः ईद अल–अधाय् ब्वति कायेगु निंतिं आपालं मनूत थःपिनिगु गामय् वनाच्वंगुलिं मिं नःगु इलय् बस्तीइ म्हो जक मनू दुगु खँ धाःगु दु ।

स्थानीय प्रहरी प्रमुख गुलाम रब्बानीं बस्ती खाली मजूगु खःसा तःधंगु मानवीय क्षति जुइगु सम्भावना दुगु खँ कनादीगु दु । तसकं भीडभाड जुइगु थनया बस्तीय झिद्वः स्वयां अप्वः मजदूरया आश्रय खः । बस्तीया लिकसं च्वंगु स्कुल नं ईया कारण न्यान्हु तक बिदा बियातःगु खः ।

सम्बन्धित बुखँ

LEAVE YOUR COMMENTS