सुकुम्बासीतय्त याकनं लालपुर्जा बीगु आश्वासन
सुकुम्बासीतय्त आश्वासन बीत स्वम्ह मन्त्री खरिपाटीया होल्डिङ सेन्टर थ्यन
येँ (नेपालभाषा टाइम्स) – सरकारया खँय् सुकुम्बासीतय्सं विश्वास मयानाच्वंगु इलय् मन्त्रीतय् छगू पुचः हे खरिपाटीइ च्वंगु होल्डिङ सेन्टरय् वनाः आश्वासन बिउवंगु दु । किपुलिइ च्वंगु होल्डिङ सेन्टरं खरिपाटीइ सारे याःपिं सुकुम्बासीतय्त आश्वासन बीगु निंतिं गृहमन्त्री सुधन गुरुङ, संघीय मामिला तथा सामान्य प्रशासन मन्त्री प्रतिभा रावल व स्वास्थ्य मन्त्री निशा मेहता थ्यंगु खः ।
खरिपाटीइ थ्यंम्ह मन्त्री रावलं सुकुम्बासीया समस्या याकनं ज्यंकाः लालपुर्जा बीगु आश्वासन नं बियादीगु खः । वय्कलं सुकुम्बासीतय्तं सुरक्षित थासय् तयेगु ज्या याकनं लालपुर्जा बीगु उद्देश्यं न्ह्याकूगु खँ धयादीगु खः । सुकुम्बासीया नामय् ताः इलंनिसें राजनीति यायेगु प्रवृत्ति अन्त्य यायेगु निंतिं सरकारं सुकुम्बासी बस्ती चीकूगु खँ नं वय्कलं धयादीगु खः ।
सुकुम्बासीतय्त आश्वासन बीगु झ्वलय् मन्त्री रावलं असारया स्वंगूगु वालय् लालपुर्जा इनेगु ज्या न्ह्याकेगु विषय थम्हं संसदय् ल्ह्वनागु व उगु हे तालिका कथं बर्दियां लालपुर्जा इनेगु ज्या न्ह्यायेधुंकूगु खँ नं धयादीगु दु । लिसें वइगु छुं वा लिपा नेपाःया आपालं जिल्लाय् लालपुर्जा इनेगु ज्या न्ह्याकेगु खँ धयादीगु खः ।
आश्वासन बीगु झ्वलय् मन्त्री रावलं होल्डिङ सेन्टरय् च्वनाच्वंपिं सकुम्बासीतय् भ्वं प्रमाणीकरण प्रक्रिया पूवनेधुंकाः जक लालपुर्जा बी फइगु खँ नं स्पष्ट यानादीगु दु । वय्कलं लिपा विवादय् मवयेमा धयागु उद्देश्यं जग्गाधनी प्रमाणीकरणया प्रक्रिया नालेगु ज्या जूगु व जग्गा मालेगु ज्या नं जटिल व संवेदनशील जूगुलिं लालपुर्जा इनेगु ज्याय् ई काइगु खँ धयादीगु खः ।
उकथं हे गृहमन्त्री सुधन गुरुङं सुकुम्बासी मस्तय्तगु ब्वनेगु निसें थीथी खँय् सरकार गम्भीर दुगु व उकिया जिम्मेवारी थम्हं कायेगु आश्वासन बियादीगु खःसा स्वास्थ्य मन्त्री मेहतां सुकुम्बासीतय् स्वास्थ्यय् गुगुं नं कथंया जटिलता वल वा छुं समस्या जुलधाःसा स्वास्थ्य मन्त्रालय हे सक्रिय जुयाः ज्या यायेगु खँ धयादीगु दु ।
किपुलिइ च्वंगु होल्डिङ सेन्टरय् लः मुनाः सुकुम्बासीतय् विचल्ली जुइवं तच्वःगु विरोध जुयाच्वंगु इलय् मन्त्रीत उमित ह्ययेकेत वंगु खः । विरोध तच्वया वनेवं होल्डिङ सेन्टरय् तयातःपिं सुकुम्बासीतय्त शनिवाः व आइतवाः खरिपाटीइ यंकूगु खः ।
थ्वहे दथुइ सुकुम्बासी तयातःगु खरिपाटीया होल्डिङ सेन्टरय् धाःसा सञ्चारकर्मीतय्त दुहां वनेत पना बिउगु दु । म्हिगः सुकुम्बासीया स्थिति सीकेत वंपिं सञ्चारकर्मीतय्त मन्त्रालय वा प्रमुख जिल्ला अधिकारी (सीडीओ) या अनुमति कयाः जक होल्डिङ सेन्टर दुहां वनेदइगु खँ धाःगु खः ।
मेखे सुकुम्बासीतय्सं धाःसा म्हिगः नं फिब्वख्यलय् प्रदर्शन याःगु दु । सुकुम्बासी व अव्यवस्थित बसोबासीतय्सं ७८ न्हु तक नं सुकुम्बासीतय् व्यवस्थापन यायेमफुगु व थुकिया विरोधय् न्ववाःपिंत गैरन्यायिक रुपय् ज्वंगु धासें प्रदर्शन याःगु खः । प्रदर्शनया झ्वलय् प्रदर्शनकारीतय्सं ‘दमन मखु न्याय बिउ,’ अभियन्तातय्त जुयाच्वंगु दमन बन्द याः, मखुसा होस याः’ धइगु नारा च्वयातःगु प्लेकार्ड नं ब्वःगु खः । थ्वहे दथुइ किपुया होल्डिङ सेन्टर झोला ज्वनाः पिहांवम्ह छम्ह मचायात श्रम संस्कृति पार्टी अध्यक्ष हर्क साम्पाङं ५० हजार तका ग्वाहालि यायेगु घोषणा यानादीगु दु । वय्कलं सामाजिक सञ्जालपाखें उगु घोषणा यानादीगु खः ।
LEAVE YOUR COMMENTS