संविधान संशोधन बहसपत्रया प्रतिवेदन तयार

येँ (नेपालभाषा टाइम्स) – ‘संविधान संशोधन बहसपत्र तयार यायेगु कार्यदल–२०८२’ या कार्यदलं सुझाव च्वयेगु ज्या लिपांगु चरणय् थ्यंगु खँ धाःगु दु । कार्यदलं सविधान दयेकेत भूमिका म्हितूगु राजनीतिक दलया सहमति मदयेकं प्रतिवेदन सरकारयात लः ल्हायेगु तयारी यानाच्वंगु खँ सूत्रं धाःगु दु । प्रधानमन्त्री बालेन साहया राजनीतिक सल्लाहाकार असिम शाहया संयोजकत्वय् नीस्वंगु कार्यदलं चैत २५ गते च्वंगु न्हापांगु बैठकं शासकीय स्वरुप, निर्वाचन प्रणाली, संघीयता, न्यायपालिका, संवैधानिक निकाय व मेगु विषयय् सुझावया निंतिं कार्ययोजना प्रस्ताव याःगु खः ।

कार्यदलं स्वला तक राजनीतिज्ञ, संविधानविद्, कानुनविद्, संविधान दयेकेगु निंतिं थीथी सरोकारवाला निकाय लिसे सहलह यानाः सुझाव मुंकूगु खः । उगु हे सुझावया आधारय् प्रतिवेदन च्वयेगु ज्या लिपांगु चरणय् थ्यंगु खँ कार्यदलया छम्ह दुजः लिलाधर सुवेदीं कनादीगु दु । वय्कःया कथं असार मसान्त तक प्रधानमन्त्री बालेन साहयात प्रतिवेदन लःल्हायेगु तयारी जुयाच्वंगु दु । प्रतिवेदन च्वयेगु ज्या थ्यंमथ्यं क्वचायेधुंकूगु दुसा आः उकिया शुद्धाशुद्धी स्वयेगु ज्या जक ल्यं दनिगु खँ नं धाःगु दु ।

सुझाव मुंकेगु झ्वलय् शासकीय स्वरुप, निर्वाचन प्रणाली, संघीयता, प्रदेश, न्यायालय, संवैधानिक निकाय लगायत संविधान लिसे स्वाःगु विषययात कयाः सम्बन्धित पक्षं महत्वपूर्ण सुझाव वःगु खँ धाःगु दु । अज्याःगु सुझावयात प्रतिवेदनय् दुथ्याकेगु ज्या जुयाच्वंगु खँ नं सूत्रं धाःगु दु ।
कार्यदलय् थीथी राजनीतिक पार्टीया प्रतिनिधित्व दुथ्याकेगु ज्या जूगु खःसा लिपांगु इलय् वयाः थीथी पार्टीं कार्यदलया ज्याखँयात कयाः असन्तुष्टि प्वंकूसें कार्यदलं पिहां वनेधुंकूगु दुसा नेपाली कांग्रेसं धाःसा प्रतिनिधि हे मछ्वःगु खः ।