येँ महानगरया झिंगुक्वःगु नगरसभा अधिवेशन क्वचाल

येँ (नेपालभाषा टाइम्स) – येँ महानगरपालिकाया १९ क्वःगु नगरसभाया अधिवेशन क्वचाःगु दु । वंगु शुक्रवाः राष्ट्रिय सभागृहय् च्वंगु नगरसभाया लिपांगु बैठकं नीति, बजेट तथा कार्यक्रम आर्थिक व विनियोजन विधेयकलिसें संशोधनसहितया प्रस्तावित विधेयक व सुझावसहितया प्रतिवेदन पारित यासें नगरसभाया अधिवेशन क्वचायेकूगु खः ।

शुक्रवाः च्वंगु नगर सभाय् बैठकय् थ्व स्वयां न्ह्यः प्यंगूगु व न्यागूगु बैठकय् न्ह्यब्वःगु संशोधन विधेयक व वार्षिक प्रतिवेदनय् सहलह याःगु खःसा थ्व झ्वलय् विधायन समितिया दुजः हुमादेवी आचार्यं विद्यमान कानुनय् समसामयिक संशोधन सम्बन्धी विधेयकया प्रस्तावित व्यवस्था न्ह्यब्वयादीगु खः ।

थुकथं नगरसभाया बैठकय् न्ह्यब्वःगु विषययात कयाः नगर सभाया दुजःपिं विमलकुमार होडा, मचाराजा महर्जन, रोजिना श्रेष्ठ, सुरेश मानन्धर, सन्तोष ढुंगेलं थःथःगु धारणा तयादीगु खः । बैठकय् नगरसभाया दुजःपिंसं तःगु धारणा, लिखित संशोधन प्रस्तावयात कःघानाः नगरसभाया अध्यक्षलिसें येँ महानगरपालिकाया कार्यवाहक प्रमुख सुनिता डंगोलं निणयार्थ सभाय् पेश यानादीगु खः ।

थुपिं विधेयकलिसें नगरसभाया न्यागूगु बैठकय् पेश जूगु न्यायिक, लेखा व सुशासन समितिया वार्षिक प्रतिवेदनय् नगरसभाया दुजःपिंसं बिउगु सुझावयात नं कःघानाः निर्णयया निंतिं पेश याःगु खः । उकथं पेश जूगु प्रस्तावत सर्वसम्मतं पारित जुइवं नगरसभाया अध्यक्ष डंगोलं नगरसभाया अधिवेशन क्वचाःगु घोषणा यानादीगु खः ।

नगरसभाया १९ क्वःगु अधिवेशन वंगु जेठ ३१ गतेनिसें शुरु जूगु खः ।