अमेरिकाया निगू सहरय् मंकाः इहि व कय्तापुजा
येँ (नेपालभाषा टाइम्स) – अमेरिकाया निगू बिस्कं सहरय् मंकाः इहि व कय्तापुजा जूगु दु । अमेरिकाया वाशिंगटन डिसीइ मंकाः कय्तापुजा याःगु खःसा कोलोराडाय् मंकाः कय्तापुजा याःगु खः ।
नेवाः अर्गनाइजेसन अफ अमेरिका (एनओए)या ग्वसालय् डिसीया मेरिल्याण्डस्थित काली टेम्पलय् मंकाः कय्तापुजा याःगु खः । मेरिल्याण्डलिसें भर्जिनिया, न्यूजर्सी, न्यूयोर्क, पेन्सिलभेनिया राज्यय् च्वंपिं गुम्ह नेवाः मस्तय् मंकाः कय्तापुजा याःगु ग्वसाः खलकं जानकारी बिउगु दु ।
वर्ल्ड नेवाः अर्गनाइजेसन अमेरिकाया नायःलिसें नेवाः संस्कृतिया ज्ञाता बासव राजोपाध्यायं नेवाः संस्कृति व संस्कारया विधिकथं कय्तापुजा याकादीगु खः ।
एनओएया पुलांम्ह नायः रामलाल श्रेष्ठं नेवाः संस्कार, संस्कृति ल्यंकेगु नापं नेपालं मचाबलय् अमेरिका वःपिं व अमेरिकाय् हे बूपिं मस्तय्त नेवाः मस्तय्त थःगु संस्कार, संस्कृति स्यनेगु ल्याखं संस्थां वंगु झिंप्यदँ न्ह्यःनिसें दँय्दसं थुकथं मस्तय्त मंकाः कय्तापुजा याना वयाच्वनागु जानकारी बियादीगु दु ।
न्हिछियंकं जूगु कय्तापुजाया ज्याझ्वःलिपा सांस्कृतिक धिमे बाजंसहित मस्तय्त देगःया परिक्रमा याकूगु खः । ज्याझ्वःया दकलय् लिपा ग्वसाः खलःया नायः राजेशलाल श्रेष्ठं कय्तापुजा याःपिं मस्त, इमि अभिभावक, पुरोहितलिसें ग्वाहालि यानादीपिं सकसितं सुभाय् देछानादीगु खः ।
अथे हे अमेरिकाया कोलोराडोय् नेवाः मिसामस्तय्त याइगु संस्कार इहि याःगु दु । कोलोराडो नेवाः खलःया ग्वसालय् नेपाली सांस्कृतिक घरय् प्यक्वःगु मंकाः इहि मुना जूगु खः ।
पुरोहित वीरेन्द्र राजोपाध्याय व प्रतिभा शर्मापाखें विधिपूर्वक पुजा यानाः याःगु इहि ज्याझ्वलय् कोलोराडोय् च्वनाच्वंपिं जोया श्रेष्ठ वान्तवा, प्रनेहा श्रेष्ठ, गुराँस श्रेष्ठ इहि संस्कार यायेगु ज्या जूगु खलःया नायः भूषणलाल श्रेष्ठं कनादिल ।
नेवाः समाजय् थी मजिउ मजूनिगु इलय् हे मिसा मस्तय्त यायेमाःगु छगू महत्वपूर्ण संस्कार इहि यायेगु खः । थ्व संस्कारय् नच्चापिं मिसा मस्तय्त ब्याःलिसे इहिपा यानाबीगु खः । थौं स्वयां झिंखुदँ न्ह्यः कोलोराडो नेवाः खलकं नेवाः भाय्, कला, संस्कृति, रीति, परम्पराया संरक्षण, प्रवद्र्धनलिसें नेवाः म्हसीकायात ल्यंका तयेगु व न्हू पुस्तायात नं उकिया जानकारी बीगु ल्याखं थीथी ज्याझ्वः याना वयाच्वनागु खलःया नायः श्रेष्ठं कनादिल । कोलोराडो सहरय् नेवाःतय् घनत्व अप्वया वनेवं थौं स्वयां झिंखुदँ न्ह्यः खलःया पलिस्था याःगु खः ।
LEAVE YOUR COMMENTS