
एजेन्सी – कोरोना भाइरस संक्रमिततय् ल्याः अप्वया वयेवं अष्ट्रेलियाया निगूगु तःधंगु शहर मेलबर्नय् बिहिवाः निसें खुवाःया निंतिं लकडाउन याःगु दु। कोरोना भाइरस न्यनावनेगु क्रम मदिइवं मेलबर्नया अधिकारीतय्सं खुवाः तक छेँय् हे च्वनेत मेलवर्नवासीतय्त आदेश बिउगु खः ।
भिक्टोरिया राज्यय् बिहिवाः जक थप १६५ म्हेसिके संक्रमण खनेदुगु खः । थ्व राज्यय् मेमेगु राज्यं वये वने यायेगु नं पूवंक प्रतिबन्ध तयेधुंकूगु दु। लकडाउनया सम्भावना दुगुलिं लिक्कसं लाःगु न्यू साउथ वेल्सया यक्व मनूतय् बुधवाः भिक्टोरिया दुहां वंगु दु। प्रहरीया कथं ३६ घन्टा स्वयां म्हो इलय् ३० हजार स्वयां अप्वः कार भिक्टोरियाय् दुहां वंगु दु। थुकिं भिक्टोरियाया मेमेगु क्षेत्रय् नं कोरोना संक्रमण अप्वइगु खतरा दुगु खँ धाःगु दु।
क्विन्सल्यान्ड राज्यं नं बिहिवाः भिक्टोरियापाखें दुहां वइपिंत निषेध यानागु घोषणा याःगु दु। क्विन्सल्यान्डं थ्वयां न्ह्यः मेगु राज्यं वइपिं यात्रुतय्त १४ न्हू क्वारेन्टाइनय् च्वने हे माःगु नियमयात स्थगित याःगु दु।मेलबर्नय् लकडाउनया कारणं जुइफुगु थीथी आर्थिक व सामाजिक स्वास्थ्यय् लायेफुगु असरया बारे चिउता प्वंकाहःगु दु। मेलबर्न नेपाःमित नं यक्व च्वनाच्वंगु शहर खः ।
मेलबर्नय् रेष्टुराँ व क्याफेत आंशिक रुपं चायेके बीगु, तर जिम, सौन्दर्य सैलुन, सिनेमा हल धाःसा पूवंक प्रतिबन्ध तःगु दु। सर्वसाधारणयात छेँय् हे च्वनेत धाःगु दु, ज्याकुथिइ वनेत, शारीरिक अभ्यास यायेत, स्वास्थ्य सेवा वा अत्यावश्यक सामान न्यायेत धाःसा पिने वंके बी । अस्ट्रेलियाय्आः तक कोविड १९ पाखें ९ हजारयात जक संक्रमण जूगु दुसा १०६ म्हेसिया ज्यान वंगु दु। भिक्टोरिया राज्य बाहेक मेगु राज्यय् तसकं म्हो जक संक्रमितत खनेदुगु दु। थन लूपिं संक्रमितत नं अप्वः थें विदेशं लिहां वःपिं व होटलय् क्वारेन्टाइनय् च्वनाच्वंपिं जूगु खँ धाःगु दु ।
LEAVE YOUR COMMENTS