चीनया कोरोना भाइरसं नेपालय् माक्स अभाव

येँ – चीनय् न्यना वनाच्वंगु कोरोना भाइरसया कारणं नेपालय् मास्कया अभाव जूगु दु । न्हापा चीनं नेपालय् हयातःगु मास्क समेत आः चीनय् माग अप्वयेवं उखे हे वंगु कारणं थन अभाव जूगु खँ धाःगु दु ।  नेपालय् सामान्य मास्क ५० गूया १८० तकांनिसें २२५ तका तूगु खःसा आः वहे मास्क ६५० तकांनिसें ९५० तका तक कायेगु यानाहःगु खँ धाःगु दु । गुलिखे वासः पसलय् मास्क मीत तकं मदयेधुंकूगु दुसा दुगु पसलय् नं भीड जुयाच्वंगु खँ धाःगु दु ।

न्हापा चीनं नेपालय् मास्क हइपिं व्यापारीतय्सं थौंकन्हय् थन दुगु मास्क हे न्यानाः चीनय् यंकेगु यानाच्वंगु दु । व्यापारीतय् कथं थुकथं हे चीनय् माक्स निर्यात जुइगु खःसा आः ५० गूया २२५ तका थ्यनाच्वंगु मास्कया भाः अझ थहां वनेफु । ‘गुणस्तरहीन मास्कया भाः हे थहां वनाच्वंगु दुसा मेडिकल मास्कया भाः अझ थहां वनेफु’ नां कने मयःम्ह छम्ह व्यापारीं ‘नेपालभाषा टाइम्स’ यात कनादिल । मेडिकल मास्क विदेशं नेपालय् आयात जुयाच्वंगु खःसां आः चिनियाँ व्यापारीत हे माक्स न्यायेत वयाच्वंगुलिं मास्कया भाः थहां वंगु खः ।

चीनय् कोरोना भाइरसया प्रकोप अप्वया वनेवं अन सरकारं हे लँय् जुइत मास्क तया जक जु धकाः निर्देशन जारी यायेवं माक्सया माग अप्वःगु खःसा उकियात पूर्ति यायेगु निंतिं थीथी देशं मास्क माग यायेगु क्रम नं अप्वया वनाच्वंगु दु ।

नेपालय् सेनायात निर्देशन ः
थ्वहे झ्वलय् कोरोना भाइरसया सम्भावित बिरामीयात आइसोलेटेड वार्डय् तयाः वासः यायेत सरकारं नेपाली सेनायात निर्देशन बिउगु दु । नेपाली सेनाया प्रवक्ता विज्ञानदेव पाण्डें थःपिंसं न्हापा इबोला बिरामीयात आइसोलेटेड वार्डय् तयाः नीछन्हु तक उपचार यानागुलिं आः नं सरकारं थःपिंत जिम्मेवारी बिउगु खँ कनादीगु दु । नेपाली सेनां २०७१ सालय् लाइबेरियाय् शान्ति मिसनय् वनाच्वंपिं थः सैनिक कर्मचारीयात इबोला संक्रमण खनेदयेवं आइसोलेटेड वार्डय तयाः सफलतापूर्वक वास याःगु खः ।

मेखे चीनं उद्धार यानाः हइपिं नेपाःमितय्त नेपाः थ्यनेवं गन तयाः परीक्षण यायेगु धइगु सवालय् सरकारं कन्हय् तकया दुने निर्णय याइ धाःगु दु । थ्व निर्णय याये मफयाः नेपाःया चार्टर्ड विमान तयारी अवस्थाय् दुसां उखे वने फयाच्वंगु मदुनि ।

सम्बन्धित बुखँ

LEAVE YOUR COMMENTS