आदिवासी अधिकार व संविधान संशोधनया खँ

येँ (नेपालभाषा टाइम्स) – आदिवासी जनजातिया अधिकार संविधानय् हे प्रभावकारी रुपं सुनिश्चित जुइकथं संविधान संशोधन यायेमाःगु निष्कर्ष पिकाःगु दु । वंगु सोमवाः नेपाः बैंक्वेटय् आदिवासी जनजाति राजनीतिक अभियानया ग्वसालय् ‘आदिवासी अधिकार व संविधान संशोधन’ विषयक ज्याझ्वलय् उगु निष्कर्ष पिकाःगु खः ।

ज्याझ्वलय् कुमार योन्जनं न्ह्यब्वःगु कार्यपत्रयात कयाः ईन्द्रबहादुर गुरुङ, सिताराम तामाङ, डा. केशवमान शाक्य व नेपाली कम्युनिष्ट पार्टीया नेता राजेन्द्र श्रेष्ठपिसं टिप्पणी यानादीगु खः । नागेन्द्र किराँतीया सभापतित्वय् जूगु सहलह ज्याझ्वलय् पूर्ण समानुपातिक निर्वाचन प्रणाली, पहिचान व आत्मनिर्णयया अधिकार सहित संघीय व्यवस्था, विशेष लिसे संरक्षित क्षेत्रया व्यवस्था व दलविहीन स्थानीय निर्वाचन प्रणाली थेंज्याःगु विषययात संविधान संशोधनया मू एजेन्डाया रुपय् न्ह्यःने न्ह्याकेमाःगु खँ धाःगु दु ।

उकथं हे सलहलया झ्वलय् आदिवासी जनजातिया संवैधानिक, राजनीतिक, सामाजिक व सांस्कृतिक अधिकार सुनिश्चित यायेत संगठित रुपय् सशक्त संघर्ष न्ह्याकेमाःगु निष्कर्ष नं पिकाःगु खः । अथे हे ज्याझ्वलय् आदिवासी मुद्दायात नीतिगत तहलय् स्थापित यायेत फुक्कं पक्षया आदिवासी दथुइ एकता व मंकाः अभियान न्ह्याकेमाःगु निष्कर्ष नं पिकाःगु खः ।