चःबिया लखं करोडौं आम्दानी

चःबि दुने नयेगु ज्वलं ज्वनाः वनेगु ला खँ हे जुइमखु । नयेगु ज्वलं जक मखु, नसाज्वलं तयेगु थलबल तकं फत्तले चःबिपाखें तापाक हे तयेगु याइ । अझ न्हापा न्हापा जूसा ज्याथजिथिपिंसं ला चःबिइ वनेत न्ह्याःगु लाकां न्ह्याना वल धाःसा भुतुलिइ तकं दुकाइमखु । उकिं पुलां पुलांगु छेँय् चःबि दयेकेबलय् फत्तले छेँदिइ हे दयेकेगु याइ ।

तर, थौंकन्हय्या आधुनिक छेँ, बंगला, अपार्टमेन्ट, हाउजिंगय् द्यनेगु क्वथाय् हे चःबि नं दयेकातःगु दइ । अले चःबिइ दुने हे लः यंकाः तकं ख्वाः–म्हुतु नं सिलेगु याइ ।थौंया युगय् थुकथंया हिउपाः वःसां चःबिइ छ्यःगु लः मेगु गनं छ्यली धाःसा मखु । चःबिइ छ्यःगु लः धलय् ल्वाकछ्यायेगु बाहेकं मेगु विकल्प मदु ।

छकः विचाः यानादिसँ चःबिइ छ्यःगु लः मेथाय् गन छ्यले फइ ! अज्याःगु लः ला ध्वंप्वालय् छ्वयेगु बाहेकं मेगु विकल्प हे मदु धाःसां जिउ ।
तर भारया छगू सरकारी संस्थां चःबिइ छ्यःगु लः जक मियाः नं दछिया दुने ७८ करोड भारु कमे याःगु दु । भारतया केन्द्रीय परिवहन मन्त्री नितिन गडकरीं थुकिया पुष्टि यासें फोहर लः धकाः वांछ्वइगु चःबिया लखं नं बांलाक कमे याये फइगु वयागु योजना दु ।

भारतया नागपुरय् थौंकन्हय् वैकल्पिक इन्धनया निंतिं छुं न्हूगु प्रयोग जुयाच्वंगु दु । चःबिइ छ्यःगु लखं बायोग्यास पिथनाः उकिं बस संचालन यानाच्वंगु दु । गडकरीयाकथं मुम्बइ, पुणे, गुहाटीइ बस चले यायेत कोइलाया प्रयोग जुयाच्वंथें आः चःबिइ छ्यःगु लखं नं बायोग्यास पिकयाः उकथं हे यातायातया साधन चले यायेगु यानाच्वंगु दु ।

 

सम्बन्धित बुखँ

LEAVE YOUR COMMENTS