वरिष्ठ साहित्यकार प्रधानया प्यंगू कृति पिदन

येँ (नेपालभाषा टाइम्स) – वरिष्ठ साहित्यकार अपर्णा प्रधानया प्यंगू कृति छक्वलं पितब्वज्या याःगु दु । साहित्यकार प्रधानया थःगु छेँय् छगू ज्याझ्वःया दथुइ नखःचखः, जात्रा पर्व, चिबाखंमुनाः व समालोचना सफू पिथंगु खः । ज्याझ्वलय् झीगु नखःचखः व जात्रापर्व, जि म्वाना च्वना (चिबाखं मुना सफू), म बाँचि रहेछु (खस् नेपाली अनुवाद) व पराग (समालोचना संग्रह) पिथंगु खः ।

वरिष्ठ समालोचक पूर्ण ताम्राकारया सभापतितवय् जूगु ज्याझ्वलय् साहित्यकार प्रधानया थुपिं सफू मूपाहां नेपालभाषा एकेदेमिया भाइस चान्सलर डा. पुष्पराज राजकर्णिकार, वरिष्ठ समालोचक पूर्ण ताम्राकार, वरिष्ठ च्वमि व साहित्यकार ईश्वरीमैयां श्रेष्ठ, समालोचक डा. भीमलाल श्रेष्ठं मंकाःकथं पितब्वज्या यानादीगु खः ।

चिबाखं मुना सफूया सम्पादन यानादीम्ह डा. हिमलाल श्रेष्ठं पिदंगु सफूया समीक्षात्मक टिप्पणी यानादीगु खः । विशेष पाहांकथं झायादीम्ह मिसा साहित्य मुनाया नायःलिसें साहित्यकार विमलप्रभा वज्राचार्यं थःगु प्रतिकुल स्वास्थ्यया दथुइ नं भाषा व म्हसीकाप्रति माया, मतिना व समर्पण यासें साहित्यया धुकू जायेकेत यानादीगु योगदानयात कयाः च्वछायादिल ।

ज्याझ्वःया सभापतिलिसें वरिष्ठ समालोचक ताम्राकारं साहित्यकार, च्वमि प्रधानया न्हूगु पिदंगु प्यंगू सफूया भाषिक व कृतिगत विशेषताया बारे समीक्षा यानादीगु खः । लिसें वय्कलं च्वमि प्रधानया व्यक्तित्वया बारे नं च्वछायादिसें वय्कलं तसकं हे संघर्ष व साधना यानाः थौं थ्व थासय् तक थ्यंकेत सफल जूगु खँ कनादिल ।