ख्वप नपां न्हापांम्ह प्रमुखप्रति विचाः हायेकल

ख्वप (नेपालभाषा टाइम्स) – ख्वप नगरपालिकाया न्हापांम्ह प्रमुख रत्नसुन्दर साँय्जु मदुगु दुःखय् ख्वप नगरपालिकां विचाः हायेकूगु दु । ख्वप नगरपालिकाया प्रमुख सुनिल प्रजापतिं ख्वप नगरया मदुम्ह न्हापांम्ह प्रमुख साँय्जुप्रति वय्कःया छेँय् वनाः विचाः हायेकूगु खः ।

ख्वप नगर प्रमुख प्रजापति थौंकन्हय् येँया महाराजगंजय् च्वंच्वनादीम्ह ख्वप नगरया न्हापांम्ह प्रमुख मदुम्ह साँय्जुया छेँय् वनाः वय्कःया छेँजःपिंत विचाः हायेकादीगु खः ।

नगर प्रमुख प्रजापतिं न्हापांम्ह नगर प्रमुख साँय्जुं ख्वपया विकासय् बियादीगु योगदान न्ह्याबलें नं लुमनाच्वनी धासें वय्कःया योगदान ख्वपया इतिहासय् न्ह्याबलें सम्मानपूर्वक लुमंकाच्वनेगु जुइ धयादिल ।

वि.सं. १९८१ असोज २९ गते ख्वप नगरपालिका वडा नं. ४ नासमना त्वालय् जनम जुयादीम्ह मदुम्ह साँय्जु वि.सं. २०१० निसें २०१४ तक ख्वप नगरया न्हापांम्ह प्रमुख जुयादीगु खः ।

मदुम्ह साँय्जुं जनकपुर चुरोट कारखाना, बाँसबारी छाला तथा जुत्ता कारखाना, हुलाक विभाग, वाणिज्य विभाग लगायतया थीथी सरकारी निकायया प्रमुखया रुपय् ज्या यानादीगु दु । लिसें वय्कः भक्तपुर विकास सहयोग संघया संस्थापकलिसें वरिष्ठ सल्लाहकार जुयाः नं ताःई तक सक्रिय जुयादीगु खः ।

वंगु असार १७ गते १०२ दँया उमेरय् वय्कः मदुगु खः ।