५ करोडया सीमां वैदेशिक लगानी म्हो जुल
येँ – सरकारं विदेश लगानीया निंतिं म्होतिं नं न्यागू करोडया लगानी जुइगुमाःगु व्यवस्था यायेवं वैदेशिक लगानी म्हो जूवंगु दु । सरकारं वैदेशिक लगानी सम्बन्धी कानुनय् संशोधन यानाः म्होतिं नं न्यागू करोड लगानी यायेमाःगु सीमा क्वःछिउगु खः । सरकारं थ्व सीमा क्वःछिइवं उद्योग विभागय् वैदेशिक लगानीया निंतिं दर्ता जुयाच्वंगु न्यागू करोडं म्हो लगानीया फाइल नं अलपत्रय् लाःवःगु दु ।
लगानीया निंतिं विभागय् फाइल दर्ता यानातःगु न्यागू करोड स्वयां म्हो लगानीया स्वीगू कम्पनी मध्ये न्यागू कम्पनीं जक लगानी थप यानाः स्वीकृति काःगु दुसा मेगु कम्पनीत लगानी थप यायेत तयार मजूगु खँ धाःगु दु । थुकिं यानाः वैदेशिक लगानी नं म्हो जूवंगु खँ विभागं धाःगु दु ।
सरकारं वंगु चैतय् लगानी सम्मेलन यायेधुंकाः विदेश लगानी सम्बन्धी कानुन हःगु खः । तर उगु कानुनय् न्यूनतम लगानी तोके यानामतः । उकिं न्यागू करोड स्वयां म्हो लगानीया निंतिं विभागय् फाइल दर्ता जूवल । लगानी सम्मेलनया निला लिपा जक सरकारं न्यूनतम लगानीया सीमा तोके यायेवं विभागय् दर्ता जूगु फाइल अथें थाःगु खः ।
विदेशं वइगु लगानी फुक्कं क्षेत्रय् न्यागू करोडया सीमा क्वःछिउगुलिं वैदेशिक लगानीइ हे लिच्वः लायेवं व्यवसायीतय्सं छुं छुं क्षेत्रय् निगू करोडतक सीमा तोके यायेमाःगु बिचाः तयाच्वंगु दु । विदेशय् नं थीथी क्षेत्रय् स्वयाः लगानीया सीमा तोके याइगु धासें न्यागू करोडया व्यवस्थाय् संशोधन यानाः निगू करोडय् हयेमाःगु खँ व्यवसायीतय्सं धयाच्वंगु दु ।
विशेषतः नेपाःमितय्सं यायेमफइगु ज्या, तर निगू करोड लगानी दःसा गाःगु क्षेत्रय् विदेशीतय्त वयेके बीमाःगु माग जुयाच्वंगु दु । थ्वहे दथुइ विभागं वंगु जेठ महिनाय् स्वंगू देय्या मुक्कं नीस्वंगू कम्पनीं लगानी प्रतिबद्धता प्वंकूगु खँ धाःगु दु । थ्व नीनिगू कम्पनीपाखें ५ अर्ब २५ करोड बराबरया लगानी प्रतिबद्धता वःगु खँ धाःगु दु ।
थुपिं मध्ये छगू जर्मनी, प्यंगू म्यानमाया व झिंच्यागू चिनियाँ कम्पनी दुगु खँ धाःगु दु । जेठय् वःगु २३ गू कम्पनी मध्ये झिंनिगू पर्यटन क्षेत्रय् लगानी यायेत वःगु दुसा सेवा उद्योगय् गुंगू व उत्पादन व सूचना प्रविधिइ छगू छगू दु । न्यागू करोडया सीमा लिपा सूचना प्रविधि क्षेत्रय् लगानी म्हो जूगु खँ धाःगु दु ।
LEAVE YOUR COMMENTS