चिकं पाइपलाइन सुरु, घौछिइ २ लाख लिटर वइगु

येँ – नेपाल भारत पेट्रोलियम पाइपलाइन म्हिगःनिसें संचालनय् वःगु दु । म्हिगः भारतीय प्रधानमन्त्री नरेन्द्र मोदी व नेपाःया प्रधानमन्त्री केपी ओलीं औपचारिक रुपं पाइपलाइनया उलेज्या यानादीगु दु । उलेज्याया निंतिं मंगलवाः न्हिनय् १२ बजे मोदीं भारतय् हे च्वनाः स्वीच तियादीगु खःसा ओलीं नेपालय् च्वनाः स्वीच तियादीगु खः ।

भिडियो कन्फ्रेन्सपाखें खँल्हाबल्हा यानाः भारतीय प्रम मोदीं दिल्लीइ हे च्वनाः बैरोनीया चिकं पाइपलाइन चायेकादीगु खःसा नेपाःया प्रम ओलीं सिंहदरबारय् च्वनाः चिकं ‘रिसिभ’या स्वीन अन यानादीगु खः ।उलेज्याया निंतिं न्हापा हे पाइपय् चिकं जायेकातयेधुंकूगु जूगुलिं स्वीच तिइवं पाइपं चिकं पिहां वःगु खः ।

उगु चिकंयात भारतीय आयल निगमया बरौनी डिपो प्रमुखं बोटलय् जायेकाः नेपाल आयल निगमया प्रमुखयात हस्तान्तरण यानादीगु खः । थुकियात निगमया प्रमुखं अमलेखगञ्जय् च्वंगु ट्यांकरय् प्वंके धुनेवं पाइपलाइनपाखें वःगु चिकं नं ट्यांकरय् वयेगु सुरु जूगु खः ।थ्व पाइपलाइन भारत सरकारया ग्वाहालिं भारतया मोतिहारी निसें नेपाःया अमलेखगन्ज तक दयेकूगु खः ।

पाइपलाइन सुरु जुइवं नेपाल आयल निगमयात दँय् निगू अर्ब ढुवान खर्च बचत

म्हिगः उलेज्या जुइवं ६९.२ किलोमिटर ताःहाकः थ्व पाइपलाइनं नियमित रुपं चिकं वयेगु सुरु जुइ । थ्व पाइपलाइनय् घन्टाय् निगू लाख लिटर डिलेज आयात यायेफइ । थ्व ल्याखं न्हि ४ हजार किलोलिटर चिकं हयेफइ । नेपालय् चिकं भण्डार यायेत ट्यांकर मगाःनिगुलिं आःयात थ्व पाइपलाइन पाखें डिजेल जक निं आयात यायेत्यंगु दु ।

थ्व पाइपलाइनपाखें चिकं वयेगु सुरु जुइवं आः ट्यांकरत भारतय् दुहां वनाः चिकं ल्ह्यये म्वालिगु जूगु दु । थुकिं यानाः निगमया अर्बौं तका ढुवानी खर्च बचे जुइगु जूगु दु । गाडीं चिकं ल्ह्ययेबलय् दँय् निगू अर्ब तका ढुवानी खर्च जुयाच्वंगु खँ निगमं धाःगु दु । आः ढुवानी खर्च बचे जुइवं निगमं चिकंया भाः नं नितका नितका क्वकाःगु दु ।

थ्व पाइपलाइन नेपाःपाखे ३७.२५ किमि व भारतपाखे ३२.६५ किमि लाः । नेपाःपाखे लाःगु पाइपलाइनया सुरक्षा जिम्मा नेपाली सेनायात बिउगु दुसा भारतपाखेया पाइपलाइनया सुरक्षा भारतया तेल उद्योग सुरक्षा निर्देशनालय व पेट्रोलियम तथा विस्फोटन सुरक्षा संगठन (पिईएसओ)पाखें जुइ ।

सम्बन्धित बुखँ

LEAVE YOUR COMMENTS