हङकङय् चीनया प्राधिकारय् हस्तक्षेप सह्य जुइमखु
हङकङया मू भूमि चीनं हङकङय् जुयाच्वंगु सरकारी विरोधी प्रदर्शन छगू भयावह घटना जूगु खँ धासें थुकीं कानुनी शासनय् गम्भीर लिच्वः लाकूगु खँ धाःगु दु । चीनया हङकङ व मकाउ मामिलाय् स्वइगु ज्याकूया प्रवक्तां छगू वक्तव्य जारी यासें धाःगु दु, ‘जिमिसं आशा याना… नागरिकत कानुनी शासनया पक्षय् दनी जुइ ।’
काचाक्क वक्तव्य पितमबिइगु देय् चीनं हङकङ मामिलाय् धाःसा छगू विज्ञप्ति हे जारी यानाः ‘कट्टरपन्थी तत्वतय्सं यानाच्वंगु खराब व आपारिधिक ज्या’ धासें थुकिया न्दिा याःगु दु ।हङकङय् वंगु च्यावाः न्ह्यवनिसें लगातार सरकार विरोध प्रदर्शन जुयाच्वंगु दु । वंगु शनिवाः व आइतवाः नं प्रजातन्त्र पक्षधर प्रदर्शनकारी व प्रहरी दथुइ हिंसात्मक झडप जुइवं चीनं थ्व वक्तव्य जारी याःगु दु ।
प्रहरीं हङकङय् च्वंगु चीन सरकारया ज्याकुथिइ दुहां वनेत स्वःपिं प्रदर्शनकारीतय्त अश्रुग्यास व रबरया गोली कयेकूगु खः । हङकङय् वाःया लिपांगु न्हि कुन्हु सरकारविरुद्ध व प्रजातन्त्रया पक्षय् प्रदर्शन जुयाच्वंगु च्यावाः थ्यनेधुंकूगु दु । हङकङ विश्वया हे सुरक्षित सहर मध्ये छगू लाः ।
तर थन थौंकन्हय् जुयाच्वगु प्रदर्शनया झ्वलय् प्रहरी व अपराधिक समूह धयातःपिं ख्वाःपाः पुनातःपिं प्रदर्शनकारी दथुइ हिंसात्मक झडप जुयाच्वंगु दु । आइतवाः जूगु प्रदर्शनय् सहभागीतय्सं थीथी थासय् पंगःत तयाः स्वतन्त्र हङकङया नारा थ्वयेकूगु खः । प्रदर्शनकारीतय्त चीनया स्वापू ज्याकुथिइ दुहां वनेमफयेकं सलंसः प्रहरीं घेराबन्दी याःगु खः ।
उगु ज्याकू भवन बचे यायेत भवनयात प्लाष्टिकया बार तयाः पनेगु निसें भवनया न्ह्यःने लुखाय् च्वंगु चिनियाँ प्रतिकयात नं प्लाटिकं बेरे यानाः सुरक्षित याःगु खः । थ्वयां न्ह्यव वंगु आइतवाः प्रदर्शनकारीतय्सं चिनिया प्रतीकय् हाखः पानाबिउगु खः । थ्वहे दथुइ चिनियाँ अधिकारीतय्सं थ्व घटनायात बेइजिङया प्राधिकारय् हाथ्या जूगु धासें थुकियात सह्य जुइमखु धाःगु दु ।
चिनिया अधिकारीतय्सं बेइजिङया प्राधिकारय् हस्तक्षेप धाःसां चिनियाँ सेना धाःसा परिचालन जुइगु सम्भावना मदुगु खँ धाःगु दु । हङकङ सरकार व प्रहरीं नं सेना परिचालन यायेगु छुं बिचाः मदुगु खँ धायेधुंकूगु दु । तर हङकङ सरकारयात सार्वजनिक सुव्यवस्था कायम यानातयेत व विपदय् राहतया निंतिं चिनिया जनमुक्ति सेनायात ग्वाहालिया निंतिं सःते फइगु व्यवस्था धाःसा हङकङया कानुनय् दु ।
LEAVE YOUR COMMENTS