ने. सं. ११४३ चौलाथ्व सप्तमी -

अमेरिकाय् खर्चया विवाद क्वचाल

वासिङटन – ताः ई निसें गतिरोध जुयाच्वंगु सरकारी खर्च सम्बन्धी विवाद अन्त्य जूगु दु । अमेरिकी राष्ट्रपति रोनाल्ड ट्रम्पं थ्व सम्बन्धी विधेयकय् हस्ताक्षर यायेवं गतिरोध चिलावंगु खः । अमेरिकाया इतिहासय् हे दकलय् ताःहाःगु सरकारी खर्चया निंतिं समस्या ब्वलंगु खः । उकिया अन्त्य यायेत राष्ट्रपति डोनाल्ड ट्रम्प सहमत जुइवं वइगु स्ववाःया निंतिं बजेट खर्च यायेत लँ चाःगु दु ।

राष्ट्रपति डोनाल्ड ट्रम्पं थ्व सम्बन्धी विधेयकय् शुक्रवाः लिबाक हस्ताक्षर याःगु खः । वय्कलं सरकारी खर्चया निंतिं वइगु फेब्रुअरी १५ तक खर्च याये दइकथं विधेयकय् हस्ताक्षर यानादीगु खः । मेक्सिको लिसे स्वाःगु सिमानाय् पःखाः दयेकेत बजेट व्यवस्था यायेमाः धासें वय्कलं अमेरिकी सिनेटलिसे थःगु माग तया वयाच्वंगु खः ।

तर शुक्रवाः पारित याःगु उगु विधेयकय् नं वय्कःया मागया बारे धाःसा छुं न्ह्यथनातःगु मदु । लिसें संसदं नं उगु विषयसं बजेट बीगु बारे छुं नं सहमति याःगु मदुनि । तर नं संघीय सरकारयात खर्चया निंतिं तसकं थाकुइवं वय्कलं विधेयकय् हस्ताक्षर यानादीगु खः । थ्व स्वयां न्ह्यः राष्ट्रपति ट्रम्पं सीमा लागाय् पःखाः दयेकेगु निंतिं ५ अर्ब डलर बीमाःगु माग याना वयाच्वंगु खः ।

वय्कः उगु अडानय् आः नं दनिगु खँ धाःगु दु । वय्कलं संसदं उगु बजेटया व्यवस्था मयाःतले सरकारी खर्च सम्बन्धी प्रस्तावयात पना वयाच्वंगु खः । शुक्रवाः अमेरिकी विपक्षी दलया नेतात लिसे सहलह लिपा सिनेटय् छगू मतं सरकारी निकाययात वइगु स्ववाःया निंतिं जक खर्च यायेगु कोष बीगु सहमति जूगु खःसा उगु हे कथं कानुन पारित जूगु खः ।

राष्ट्रपति ट्रम्पं न्ह्यःने हःगु सीमा सुरक्षा बारेया खँल्हाबल्हा धाःसा जारी हे जुइगु सहमति जूगु दु । अमेरिकाय् दुहां वयेत स्वयाच्वंपिं अवैध आप्रवासीयात पनेत अमेरिका व मेक्सिको सिमानय् पःखाः दनेमाः धकाः राष्ट्रपति ट्रम्पं अडान कया वयाच्वंगु खः । तर विपक्षी दलं धाःसा उगु प्रस्ताव सम्भव मदु धायेगु यानाच्वंगु दु ।

अमेरिकाय् वंगु सुइन्यान्हु न्ह्यवंनिसें सरकारी खर्च ठप्प जुयाच्वंगु खः । थुगु इलय् अमेरिकाया संघीय निकायया च्यागू लाख कर्मचारी तलब मकासें ज्या यानाच्वंगु दु । राष्ट्रपति ट्रम्पया पःखाः दनेगु सम्बन्धी प्रस्तावयात क्वय्या सदनय् निर्णायक हैसियत म्हिते फुगु विपक्षी डेमोक्र्याट पार्टीं अस्वीकार याना वयाच्वंगु खः ।