‘मतदातातय्त ख्याच्वः बियातःगु इमेलया जिम्मेवार इरान’

एजेन्सी – अमेरिकी राष्ट्रिय सुरक्षा अधिकारीतय्सं डेमोक्र्याटिक मतदातातय्त ख्याच्वः बीगु कथं इमेल छ्वयेगु ज्याय् इरान जिम्मेवार दुगु खँ धाःगु दु। नेशनल इन्टेलिजेन्सया निर्देशक जोन र्‍याटक्लिफं धाःगु दु, ‘थ्व इमेल चरम दक्षिणपन्थी ट्रम्प पक्षधर समूहपाखें वःगु व मनूतय्त उत्तेजित यानाः अस्थिरता न्यंकेगु उद्देश्यं छ्वयाहःगु खनेदु ।’

अमेरिकाय् राष्ट्रपतीय चुनाव जुइत निवाः स्वयां म्हो जक ई दनिगु इलय् नेशनल इन्टेलिजेन्सया निर्देशकं थ्व चुनावय् इरानलिसे रुं नं हस्तक्षेप यायेगु कुतः यानाच्वंगु खँ धाःगु दु । वाशिंगटनं न्ववायेगु झ्वलय् र्‍याटक्लिफं निगुलिं देशं गैरकानुनी रुपं छुं मतादाताया विवरण गैरकानुनी रुपं खुयाकाःगु खँ नं धयादीगु दु। वय्कलं इरानं अमेरिकीतय्त फर्जी इमले छ्वयाः अन्योल व असहज यायेगु लिसें अमेरिकी प्रजातन्त्रप्रतिया आत्मविश्वास कमजोर यायेत स्वयाच्वंगु द्वपं बियादीगु दु ।

चुनावया न्हि न्ह्यःने वयाच्वंगु इलय् आकाझाकां याःगु थ्व ब्रिफिङय् संघीय अनुसन्धान ब्युरो (एफबीआई)या निर्देशक क्रिस्टोफर वारे नं दुगु खः । वय्कलं अमेरिकी चुनाव सुरक्षित दुगु व थज्याःगु हस्ताक्षेप स्वीकार जुइमखु धयादीगु खः । जोन र्‍याटक्लिफं रुसबारे इरानं याःगु थेंज्याःगु ज्याया बारे जानकारी थःके मवःनिसां वयाके नं छुं मतदातातय् विवरण दुगु खँ धयादीगु दु। रुसं सन् २०१६ या राष्ट्रपतिय निर्वाचनय् हस्तक्षप याःगु धासें तच्वःगु आलोचना जूगु खः ।

थ्वहे दथुइ पुलांम्ह अमेरिकी राष्ट्रपति बराक ओबामां डेमोक्र्याटिक उम्मेदवार जो बाइडनया पक्षय् न्हापांखुसी चुनावी भाषण बिसें ट्रम्पं न्हियान्हिथं मखुगु खँ ल्हानाच्वंगु द्वपं बियादीगु दु । फिलाडेल्फियाय् न्ववायेगु झ्वलये ओबामां ट्रम्पं राष्ट्रपतिया भूमिकायात रियालिटी शो थें दयेकाबिउगु व थःत बाहेक सुयागुं वास्ता मयाःगु खँ धयादीगु खः । वय्कलं धयादीगु दु, ‘थ्व रियालिटी शो मखु, थ्व वास्तविकता खः । वय्कलं थःगु भूमिका बांलाक निर्वाह यायेमफुगुया मूल्य झीसं पुलेमालाच्वंगु दु ।’

ओबामां थःगु कार्याकालय् उपराष्ट्रपति जुयादीम्ह बाइडनं अमेरिकाया अन्तर्राष्ट्रिय स्थानयात हाकनं बल्लाकीगु व हरेक अमेरिकीया निंतिं ज्या याइगु खँ धयादीगु खः । मेखे बाइडन धाःसा चुनावी अभियानयात लिछ्यानाः ट्रम्पलिसे जुइगु अन्तिम राष्ट्रपतिय बहसया निंतिं तयारी यानाच्वनादीगु दु ।

मेखे नर्थ क्यारोलाइनाय् समर्थकतय् न्ह्यःने न्ववायेगु झ्वलय् ट्रम्पं धयादीगु दु, ‘ट्रम्पया समृद्धि व बाइडनया लकडाउनदथुइ मतदातातय्सं ल्येमाल धाःसा जितः ल्ययेमाः ।’ वय्कलं अफगानिस्तानय् तैनाथ अमेरिकी फौजयात स्वदेश लित हयेगु बचं नं हाकनं दोहरे यानादीगु दु ।

सम्बन्धित बुखँ

LEAVE YOUR COMMENTS