ने. सं. ११४६ बछलाथ्व चौथी - बुंगद्यः सालिगु

मनपां हानं स्वाब परीक्षण याइगु

येँ (नेपालभाषा टाइम्स) – येँ महानगरपालिकां थनिंनिसें हानं निःशुल्क पीसीआर परीक्षण याइगु जूगु दु। सरकारं क्वःछिउगु मापदण्ड दुने लाःपिं मनूतय् निःशुल्क पीसीआर परीक्षण यायेगु निंतिं स्वाब संकलन ज्या न्ह्याकेत्यंगु खँ येँ मनपा मेयर विद्यासुन्दर शाक्यं कनादीगु दु । उकथं हे कन्ट्रयाक्ट ट्रेसिङय् लाःपिं अशक्त व जेष्ठ नागरिकया पीसीआर परीक्षण यायेत मोबाइल भ्यान सञ्चालन यानाः स्वाब संकलन यायेत्यनागु खँ नं वय्कलं कनादिल ।

अथे हे वय्कलं लिपांगु इलय् कोरोना संक्रमण अप्वया वनाच्वंगु धासें संक्रमणया चक्र त्वाःथलेत प्रभावकारी पलाः ल्ह्वनेमाःगु ई वःगु खँ नं कनादिल । थौंकन्हय् नखःया झ्वलय् कोरोना संक्रमण अप्वया वनाच्वंगु धासें उकियात म्हो यायेगु निंतिं स्वनिगःया नगरपालिका फोरमं सरकारयात इनाप यायेधुनागु खँ वय्कलं कनादिल ।