मनपाया डोजरयात प्रतिरोध
येँ (नेपालभाषा टाइम्स)÷खाली जग्गा खन कि छुं नं निर्माण याना हे छ्वयेगु सरकारया प्रवृत्ति खः । आः येँ मनपा नं उकिं मजूगु खने दत ।
थनया अनामनगरय् च्वंगु छगू सार्वजनिक जग्गाय् म्हिगः मनपां डोजर चले यायेवं स्थानीयवासीलिसे ल्वापु जूगु दु । स्थानीयवासीं संरक्षण याना तःगु उगु खाली जग्गाय् वडा भवन दयेकेगु धकाः मनपां म्हिगः डोजर चले याःगु खः । तर स्थानीय जनतां विपदया इलय् छ्यलेगु लिसें पर्यावरण बांलाका तयेत आवश्यक खाली जग्गाय् छुं नं छेँ दने बी मखु धकाः प्रतिकार यायेवं मनपाय नगर प्रहरीलिसे कचवं जूगु खः ।
गुलिखे मनूत धाःसा अन वडा भवन दयेके बीमाः धकाः नं सः तः वःगु खः । थुकिं यानाः स्थानीयवासीत हे निगू खेमाय् विभाजित जुयाः ल्वापुया अवस्था सिर्जना जूगु खः ।
आः खाली जुयाच्वंगु उगु जग्गाय् वडा नंं. २९ या वडा भवन दयेकेगु धकाः मनपां तयारी याःगु खः । थ्व स्वयां न्ह्यः नं अन वडा भवन दयेकेगु धकाः तयारी जूबलय् स्थानीय जनतां दयेके मबिउगु खः ।
मनपां सार्वजनिक जग्गाया सुरक्षा यायेमाःथाय् अःखतं शक्ति प्रयोग यानाः हड्पे याये त्यन धकाः नं स्थानीय जनतां विरोध याःगु दु ।
येँ मनपाया ३२ गू वडा मध्ये थःगु भवन मदुगु वडा कार्यालयत यक्वं दु । थुकी मध्ये वडा नं. २९ छगू धाःसा थःगु हे वडा दुने तकं च्वनेगु थाय् मदयाः थौंकन्हय् वडा नं. ३० या छखा छेँय् च्वनाच्वंगु दु । उगु वडाया ज्याकू तयेत वडा दुने गुलि थाय् मालं नं लुइके मफयाच्वंगु दु ।
थ्व स्वयां न्ह्यः मनपां वंगु मोहनि ताकाय् वडा २५ य् लाःगु स्थानीय त्वाःछेँय् नं वडा भवन दयेकेगु धकाः डोजर चले याःगु खःसा उकियात स्थानीय जनतां कडा रुपं विरोध याःगु खः । वडा २५ या ज्याकू ज्याथाय् दयेकेगु धकाः जूगु कुतः नं सम्पदा क्षेत्रय् लात धकाः विरोध जुइवं स्थगित जूगु दु ।
येँय् वडा नं. ८, १९, २३, २८, ३१ या नं थःगु हे वडा भवन मदयाः मेपिंथाय् बालं कयाः चले याये मालाच्वंगु दु ।
LEAVE YOUR COMMENTS