ने. सं. ११४६ बछलागा सप्तमी -

देय्न्यंकं हनाच्वन न्हूदँ ११४३ या लसता ज्याझ्वः

येँ (नेपालभाषा टाइम्स)- थौं नेपाल संवत् ११४३ क्यनीगु न्हूदँ । थ्व लसताय् थौं स्वनिगःया येँ देय् लिसें देय्या थीथी जिल्लाय् थीथी ज्याझ्वःत न्ह्याकाच्वंगु दु । न्हूदँया लसताय् थौं सुथय् ८ बजे निसें बसन्तपुली साँस्कृति ¥याली न्ह्याःगु दु । थुगुसी नं दँय्दसं थें द्वलंद्वः मनूत न्हूदँ साँस्कृतिक ¥याली थीथी बाजंसहित ब्वति कयाच्वंगु दु । न्हूदँया लसताय् थौं थनया बसन्तपुलिइ नेपाल संवत् न्हूदँ राष्ट्रिय समारोह समिति–११४३ या लसताय् तःजिगु सांस्कृतिक ¥याली पिकाइगु ग्वसाः दु । ¥याली लिपा बसन्तपुलिइ हे जुइगु सभाय् प्रधानमन्त्री शेरबहादुर देउवां मूपाहां कथं ब्वति कयादीगु ज्याझ्वः दु । ख्वपय् म्हिगः हे न्हूदँया ज्याझ्वः याःगु दुसा यलय् थुगुसी न्हूदँया छुं नं ज्याझ्वः मजू ।

बसन्तपुलिइ जुइगु सभाय् प्रधान–मन्त्री देउवां नं सम्बोधन यानादी । सभा न्ह्यः जुइगु सांस्कृतिक ¥यालीइ थीथी खलः पुचःतय्सं बाजं सहित ब्वति काइगु जुयाच्वंगु दु । उगु ¥याली येँया थःने व क्वःने लागा चाःहिलाः हानं बसन्तपुलिइ तुं वयाः सभाय् हिली ।

सांस्कृतिक ¥याली व सभाय् ब्वति कायेत न्हूदँ समारोह समितिया नायः प्रा.डा. नरेशमान वज्राचार्यं सकसितं इनाप यानादीगु दु ।

थिमिइ स्वां देछाये ः
अथे हे थौं हे सुथय् थिमिया शंखधर चोकय् शंखधर साख्वाःया झ्वाताय् स्वां देछाइगु नं ज्याझ्वः दु । उगु ज्याझ्वलय् नं प्रधानमन्त्री शेरबहादुर देउवां मूपाहां कथं ब्वति कयादी । ज्याझ्वःया ग्वसाः खलः राष्ट्रिय विभूति शंखधर साख्वाः प्रतिष्ठानया नायः ज्ञानराम श्रेष्ठं कनादी कथं ज्याझ्वलय् नेपाल संवत्या आन्दोलनय् सक्रिय जुयादीपिं निम्ह न्ह्यलुवापिंत सम्मान व थीथी माध्यमं नेपाल संवत्या आन्दोलनयात तिबः बियादीपिं न्याम्हेसित ‘शंखधर पदक’ लःल्हाइगु ग्वसाः दु ।

मखनय् मो.सा. ¥याली ः
न्हूदँया हे लसताय् थौं थनया मखनं मोटरसाइकल ¥याली पिकाइगु ज्याझ्वः दु । टाइम्स एफ.एम.या ग्वसालय् पिहां वइगु थ्व ¥यालीया उलेज्या येँ मनपाया मेयर बालेन साहं यानादीगु ग्वसाः दु । स्वनिगःया थीथी लागा चाःहिलाः ¥याली क्वचाइगु खँ धाःगु दु । थुगुसीया ¥यालीइ असभ्य व्यवहार यायेगु, मादक पदार्थ त्वनेगु ज्यायात निषेध याःगु दु ।

भिंद्यः त्वालय् मचा ब्वाज्या ः
न्हूदँया लसताय् म्हिगः न्हू पुचःया ग्वसालय् भिंद्यः त्वालय् २४ क्वःगु मचा ब्वाज्या जुल । न्हूदँ समारोह समितिया नायः प्रा.डा. नरेशमान वज्राचार्यं रिबन चानाः ब्वाज्याया उलेज्या यानादीगु खः । ब्वाज्याय् मिजंमचापाखे निमेश श्रेष्ठ, नरेश शुरुधामी, व मिशन श्रेष्ठ न्हाप, लिउ व लियां लिउ लाःगु खःसा मिसा मचापाखे साइबा श्रेष्ठ, ग्रिश्मा रंजितकार व दियोस्ना श्रेष्ठ न्हाप, लिउ व लियां लिउ लाःगु खः ।

५ निसें १० तकया मस्तय्सं ब्वति काःगु उगु ब्वाज्या ज्याझ्वः न्हू पुचःया नायः मनरत्न शाक्यया सभापतित्वय् जूगु खः । त्याःपिं मस्तय्त दां सिरपाः बिउगु खः ।

यलय् दुःखं
यलय् धाःसा थुगुसी न्हूदँया लसताय् छुं नं ज्याझ्वः मयाइगु जूगु दु । वाङमय शताब्दी पुरुष सत्यमोहन जोशी मदुगु दुःखय् यलया न्हूदँ समारोह समिति, नेपालभाषा मंकाः खलः यल लिसें थीथी पुचःतय्सं थुगुसी न्हूदँया लसताय् छुं नं ज्याझ्वः मयायेगु निर्णय याःगु खः । सत्यमोहन जोशी मदुगु दुःखं कःगुलिं लसताया छुं नं ज्याझ्वः मयायेगु निर्णय कथं थुगुसी यलय् न्हूदँया ¥याली, सभा आदि ज्याझ्वःत मजुइगु खँ धाःगु दु ।

ख्वपय् म्हिगः हे न्हूदँया सांस्कृतिक ¥याली
तिथिया गडबडीं यानाः ख्वपय् धाःसा म्हिगः हे न्हूदँ न्यायेकेगु ज्या जुल । ख्वपय् म्हिगः म्हपुजा माने याःगुलिं न्हूदँ नं म्हिगः हे माने याःगुखः । थ्व लसताय् म्हिगः ख्वपय् न्हूदँया ¥याली पिकायेगु ज्या जुल । नेवाः वसः पुना वःपिं आपालं मिसा मिजंतय्सं थीथी कथंया बाजं थानाः म्हिगः ¥याली पिकाःगु खः । थुकी ख्वपया थीथी खलः पुचःया सहभागिता दुगु खः ।

नेपालभाषा साहित्य तःमुँज्यां च्याम्हासिंहां पिकाःगु ¥याली ख्वप देय् चाःहिउगु खः । ¥याली थीथी लागा चाःहिलाः खौमाय् थ्यंकाः मा. जगतसुन्दर मल्लया झ्वाताय् स्वां देछानाःलि क्वचायेकूगु खः ।