बेलायतय् नेपाःमि मिसा

येँ – समाजय् नेपाःमि मिसातय् अवस्था व इतिहासकालंनिसें उमिसं फये माला वयाच्वंगु समस्यायात कयाः बेलायतया लण्डनय् छगू सहलह ज्याझ्वः जुल । पासा पुचः गुथि यूकेया ग्वसालय् जूगु उगु सहलह ज्याझ्वलय् मू वक्ता कथं संकिपा निर्माता लिसें पत्रकार सुबिना श्रेष्ठं न्वचु बियादीगु खः ।

ज्याझ्वलय् लण्डन नेपाली समाजया दुजःपिं रुक्मणी मानन्धर, मेनका श्रेष्ठ, प्रतिमा जोशी व लक्ष्मी राईया दथुइ छगू प्यानल सहलह नं जूगु खः । थुकी वय्कःपिंसं नेपाःया मिसातय्सं फये माःगु समस्या व उकियात गय् यानाः कःघायेगु धइगु बारे थःगु अनुभव कनादीगु खः ।

पासा पुचः गुथि यूकेया नायः संयुक्त श्रेष्ठं बेलायतय् च्वनाच्वंपिं नेपाली समाजया मिसापिनि समस्या बारे न्ह्यथँसें थःगु संस्थां थुकियात गय् यानाः समाधान यासें प्रगतिशील लँपुपाखे न्ह्याः वनेगु ज्या यात धकाः कनादीगु खः । पुलांम्ह छ्यांज्ये त्रिवेणी गुरुङं बेलायतया नेपाली समाज दथुइ थ्व विषयय् अझ चर्चा यायेमाःगु बिचाः तयादिल ।