गुथि जग्गाय् दंगु स्कुल स्थानीयपाखें थुना बिल

सम्पदाप्रेमितय्त प्रहरीं ख्याच्वः बियाच्वंगु द्वपं

येँ- थनया टेकु पचलिइ महेन्द्र सरस्वती निम्न माध्यमिक विद्यालयं दयेकाच्वंगु भवन गुथियार, स्थानीय जनता व सम्पदाप्रेमीत जानाः म्हिगः थुना बिउगु दु । उगु थाय् न्हापा पुखू जुयाच्वंगु खःसा आः पुखू मदयेधुंकाः विद्यालयं छ्यला वयाच्वंगु खाली जग्गाय् भवन दयेकेत्यंगु धासें स्थानीय जनता व गुथियारतय्सं विरोध याना वयाच्वंगु खः ।

म्हिगः उगु थासय् मुंपिं सम्पदाप्रेमी लिसें निसः स्वयां अप्वः मनूतय्सं अन चिनातःगु डण्डी व थनातःगु पिलर तकं थुना बिउगु खःसा भवन दयेकेगु निंतिं हयातःगु फर्मा नं च्याकाबिउगु खः । उगु थासय् भवन दयेकेगु निंतिं येँ महानगरपालिकां नक्सा नं पास यानातःगु मदुसा उकिया लालपुर्जा नं मदुगु खँ धाःगु दु ।

गुथिया उगु जग्गाय् स्कुलया मस्त म्हितेगु यानाच्वंगु खःसां आः स्कुलं मेगु हे प्रयोजनया निंतिं भवन दयेकेत्यंगुलिं विरोध यायेमाःगु खँ गुथियारतय्सं धाःगु दु । स्कुलया आः दुगु भवनय् हे माक्व विद्यार्थी जायेके मफयाच्वंगु स्कुलय् मेगु भवन आवश्यक मदु धासें स्थानीय जनतां विरोध याःगु खः ।

मेखे १२ वडाया वडाध्यक्ष विकास डंगोलं धाःसा थम्हं अन स्कुल प्रयोजनया निंतिं भवन दयेकेत्यंगुलिं छुं मधयागु खँ कनादिल । स्कुल भवन दयेके मबिल धाःसा थःत शिक्षा विरोधी धाइगु व दयेके बिल धाःसा सम्पदा विरोधी धाइगु खँ कँसें वय्कलं न्हापा उगु भवनया शिलान्यास यायेत थःत हे प्रमुख अतिथि दयेकातःगु खःसा गुथि संस्थानं अन भवन दयेके बीमते धकाः पौ वयेवं थम्हं शिलान्यास यायेगु ज्या तकं मयानागु खँ कनादिल ।

वडाध्यक्ष डंगोलं थ्व भवन दयेकेगु खँय् नितान्त राजनीतिक पार्टी हाबी जूगु दु धासें थम्हं स्थानीय जनतायात सहलहया निंतिं सःतागु इलय् मवःगु द्वपं नं बियादिल । गुथिया जग्गा ल्यंकेगु खँय् थः सहमत दु धासें वय्कलं न्हापा स्कुलं हे छ्यलाच्वंगु जग्गाय् आः अनावश्यक रुपं हस्तक्षेप जूगु द्वपं नं बियादिल । तर सम्पदाप्रेमीतय्सं धाःसा अन दुगु संरचना चीकेगु निंतिं वडाध्यक्ष डंगोलं ग्वाहालि मयाः धासें थुकी नं गनं कमिसनया खँ जक दुला धकाः न्ह्यसः थंगु दु । मेखे डंगोलं धाःसा थम्हं अज्याःगु छुं नं कथंया ज्या मयानागु धासें पचली क्षेत्रया विकास यायेगु निंतिं थम्हं थीथी कथंया योजना दयेकाः ज्या याना वयाच्वनागु दावी यानादीगु दु ।

स्थानीय जनतां अन भवनया संरचना थुनाबी धुंकाः प्रहरी वयाः छानबीन याःगु दु । प्रहरी अन जूगु ज्याखँया मुचुल्का नं याना यंकूगु दु । मेखे अन दुगु संरचना थुंगु खँयात कयाः उकी ल्हाः दुपिं सम्पदाप्रेमीतय्त प्रहरीं मालाच्वंगु खँ धाःगु दु । प्रहरीं गुलिसितं फोन यानाः हे उकिया बारे न्यनेकने यानाच्वंगु व गुलिखे मनूतय्त ज्वनेगु कथं तयारी यानाच्वंगु द्वपं समेत सम्पदाप्रेमीपिंसं बिउगु दु । अथेसां प्रहरीं आः तक सुयातं ज्वंगु धाःसा मदुनि ।

सम्बन्धित बुखँ

LEAVE YOUR COMMENTS