स्कुल व हल नं चायेकेगु निर्णय

येँ (नेपालभाषा टाइम्स) – कोरोना संक्रमणया कारणं बन्द यानातःगु यातायात, बजाः, धार्मिकस्थल खुल्ला यायेधुंकाः आः स्कुल, सिनेमा हल व जिमखाना नं चायेकीगु जूगु दु । म्हिगः च्वंगु कोरोना रोकथाम सम्बन्धी उच्चस्तरीय निर्देशक समिति (सीसीएमसी) या बैठकं थ्व निर्णय यासें सरकारयात सिफारिस यायेगु निर्णय याःगु खः ।

स्कुल चायेकेगु वा मचायेकेगु धकाः ताः ई न्ह्यवंनिसें विवाद जुयाच्वंगु खःसा म्हिगः स्कुल नं चायेकेगु धकाः सरकार यात सिफारिस यायेगु निर्णय याःगु खः । आः चायेकेगु निर्णय याःसां छुं जुयाः लिपा बन्द याये माःगु अवस्था वल धाःसा छुं नं इलय् बन्द याये फइगु अधिकार नं सीसीएमसीं हे काःगु दु ।

सीसीएमसीं थौंकन्हय् देशय् कोरोना संक्रमण कम जुयाच्वंगु विश्लेषण यासें थ्व निर्णय याःगु खः । लिसें आः निगूगु चरणय् न्हूगु कथंया कोरोना संक्रमण खने दयाच्वंगु कारणं उकिया बारे धाःसा सरकार सतर्क जुइ माःगु सुझाव नं बिउगु दु । अज्याःगु लहर महयेकेगु लागिं कडा कथंया स्वास्थ्य मापदण्ड लागू यायेगु व पालना मयाइपिं कडा कारवाही यायेगु निर्णय नं बैठकं याःगु दु ।

सम्बन्धित बुखँ

LEAVE YOUR COMMENTS