अष्ट्रेलियाय् २२ हजार स्वास्थ्यकर्मी आन्दोलनय्
अष्ट्रेलियाया छगू राज्यय् २२ हजार स्वास्थ्यकर्मीत आन्दोलित जूगु दु । अष्ट्रेलियाया न्यू साउथ वेल्स राज्यया थुपिं स्वास्थ्यकर्मी व कर्मचारीतय्सं थःपिनि असुरक्षा अप्वःगु धासें आन्दोलनय् कुहां वःगु खः । अस्पताल व स्वास्थ्य केन्द्रया कार्यस्थलय् सुरक्षा अभाव जूगु उमिसं धयाच्वंगु दु ।
न्यू साउथ वेल्सया अस्पताल व स्वास्थ्य केन्द्रया मजुदर युनियनया थ्यंमथ्य. न्यासःम्ह प्रतिनिधितय्सं मंगलवाः अगस्ट १ तारिख निसें ज्या दिकेगु निंतिं मतदान याःगु खः । उमिसं वइगु अगस्ट १ तारिखय् प्यघौ ज्या दिकेगु माग यासें आन्दोलनय् ऐक्यवद्धताया निंतिं मतदान याःगु खः । उमिस अस्पताल व स्वास्थ्य केन्द्रय् सुरक्षाया माग याःगु दु ।
थप सुरक्षा व्यवस्था मजूतले ज्या मयायेगु खँ उमिसं धाःगु दु । न्यूसाउथ वेल्स राज्यया स्वास्थ्य सेवा युनियनया सचिव गेरार्ड हाइजं धाःगु दु, ‘अस्पतालय् गुलिखे हत्या जूगु दु । गुलिखेसित छुरां सूगु दु, गुलिखेसित दाःगु दु । उकिं सुरक्षाया बांलाःगु प्रबन्ध मयायेकं जिपिं अस्पताल वनाः ज्या यायेत तसकं थाकु ।
जिमिसं आः छु खनाच्वनागु दु उकियात आधारभूत रुपय् हे परिवर्तन यायेगु ई खः थ्व ।’मजदुर प्रतिनिधितय्सं अति जुयाः हे थ्व मतदान याःगु खँ वं धाःगु दु । वय्कलं थप २५० म्ह सुरक्षा गार्ड उपलब्ध याकेत थःपिंसं न्यू साउथ वेल्स राज्यया सुरक्षा निकाययात इनाप यानागु खँ नं धयादीगु दु ।
छगू तथ्यांक कथं वंगु दँय् जक उगु राज्यय् ४६५ गू आक्रमणया घटना जूगु खः । न्हापांखुसी दछिया दुने थुलिमछि आक्रमण जूगु खँ थःपिंसंअसुरक्षा महसुस यानाच्वनागु खँ मजदूरतय्सं धाःगु दु ।
LEAVE YOUR COMMENTS