अर्जेन्टिनां इजरायललिसेया मैत्रीपूर्ण कासा रद्द यानाबिल

एजेन्सी- गाजा क्षेत्रय् इजरायलं प्यालेस्टिनीतय्त यानाच्वंगु क्रूद्ध व्यवहारया कारणं अर्जेन्टिनां इजरायललिसेया मैत्रीपूर्ण कासा रद्द यानाबिउगु दु । विश्वकप तयारीया झ्वलय् अर्जेन्टिनां शनिवाः इजरायललिसे मैत्रीपूर्ण कासा म्हितेत्यंगु खः ।

अर्जेन्टिनाया स्ट्राइकर गोन्जालो इगवाइनं मंगलवाः छगू स्पोर्ट च्यानललिसे खँ ल्हासें अन्तय् सही निर्णय जूगु खँ धाःगु दु ।
इजरायलया प्रधानमन्त्री बेन्जामिन नेतान्याहुं कासा रद्द मयायेगु निंतिं अर्जेन्टिनी राष्ट्रपति मोरिसियो माक्रीयात फोन यानाः इनाप याःगु खःसां अर्जेन्टिनां कासा म्हितेत अस्वीकार याःगु खः ।

अर्जेन्टिनां कासा रद्द याःगु समाचार वयेवं गाजाय् प्यालेस्टिनीतय्सं लापा थानाः लसकुस याःगु दु । थन जुयाच्वंगु लिपांगु झडपय् इजरायली सेनां १२० म्ह प्यालेस्टिनीतय्त स्यायेधुंकूगु दु ।

कासा रद्द जुइवं वेस्ट ब्यांकया रमल्लाहय् प्यालेस्टिनी फुटबल संघं छगू विज्ञप्ति पिथँसें अर्जेन्टिनी कप्तान लियोनल मेस्सी लिसें मेपिं कासामिपिंत सुभाय् बिउगु दु ।

‘नैतिक व कासाया मूल्यमान्यताया थौं जीत जूगु दु । कासा रद्द यानाः इजरायलयात ह्याउँगु कार्ड क्यंगु दु’ संघया प्रमुखं रोयटर्स समाचार संस्थायात प्रतिक्रिया बिउगु दु । थ्वयां न्ह्यः कासा जुइगु तयारी जुयाच्वंगु इलय् संघं प्यालेस्टिनीतय्त मेस्सीया तस्बीर व जर्सी च्याकेत आह्वान याःगु खः । रुसय् वइगु जेठ ३१ गते निसें जुइत्यंगु विश्वकपया तयारीया झ्वलय् अर्जेन्टिनां वेस्ट जेरुसलेमय् इजरायललिसे मैत्रीपूर्ण कासा म्हितेगु क्वःछिनातःगु खः ।

कासा जुइगु थाय् जेरुसलेम तसकं संवेदनशील थाय् खः । इजरायलं जेरुसलेमयात थःगु राजधानी धया वयाच्वंगु दु । तर प्यालेस्टाइनं नं जेरुसलेमया पूर्वी भागयात भविष्यया थःपिनिगु राजधानी कथं धयातःगु दु ।

न्हापा हाइफा सहरय् जुइ धयातःगु कासायात जेरुसलेमय् म्हितकेगु जुइवं प्यालेस्टिनीत तंम्वयाच्वंगु खः । थ्व हे कारणं नं अर्जेन्टिनां कासा रद्द यानाबिउगु खः ।