अमेरिकापाखें ६० गू व्यापारिक साझेदार देशय् न्हूगु भंसार शुल्क लागू
वाशिंगटन – अमेरिकां थःपिनिगु व्यापार नीति पुनःसंरचना यासें चीान, भारत, युरोपेली संघ (इयु)लिसें ख्वीगू व्यापारिक साझेदार देय्यात लक्षित यासें न्हूगु भंसार शुल्क लागू याःगु दु । राष्ट्रपति डोनाल्ड ट्रम्पया प्रशासनं अमेरिकां जबरजस्ती श्रमपाखें उत्पादन जूगु वस्तुया आयात पनेत पर्याप्त पलाः मन्ह्याकूगु द्वपं बिसें शुक्रवाःनिसें लागू जुइकथं न्हूगु भंसार शुल्क (ट्यारिफ) लगे यायेगु घोषणा याःगु खः ।
वंगु फेब्रुअरीइ सर्वोच्च अदालतं राष्ट्रपतिया व्यापक शुल्क अधिकार क्वपालाः सीमित यायेवं तयार याःगु न्हूगु व्यवस्था कानुनी रुपं अझ बल्लाःगु धाःगु दु । न्हूगु भंसार शुल्क १० निसें १२.५ प्रतिशत तक क्वछिउगु दु । ट्रम्प प्रशासनया कथं करिब लछि ताःहाकःगु अनुसन्धान लिपा थ्व नीति थुगु दँया सुरुइ अस्थायी रु।पय् लागू याःगु १० प्रतिशतया विश्वव्यापी आयात शुल्कया थासय् वःगु खः । उगु अस्थायी व्यवस्था १५० न्हु लिपा शुक्रवाःनिसें क्वचाःगु दु ।
अमेरिकी व्यापार प्रतिनिधि जेमिसन ग्रियरं करिब छगू शताब्दीनिसें जबरजस्ती श्रमपाखें उत्पादन जूगु ज्वलंया आयातय् प्रतिबन्ध तया वयाच्वंगु खँ न्ह्यथँसें आः अमेरिकाया व्यापारिक साझेदारतय्सं नं थ्व हे स्तरया प्रतिवद्धता क्यनेगु ई वःगु धाःगु दु । ग्रियरयाकथं न्हूगु शुल्कं अमेरिकी व्यापारय् तःधंगु हे ब्व कःघानाच्वंगु मुख्य अर्थतन्त्रयात नं कःघाःगु दु ।
घोषणाकथं जबरजस्ती श्रमसम्बन्धी प्रतिबन्ध लागू याःगु वा अज्याःगु प्रतिवद्धता प्वंकूगु अर्थतन्त्र दुगु देशय् १० प्रतिशत शुल्क लगे जुइ । थ्व पुचलय् क्यानाडा, युरोपेली संघ (इयु), भारत दु । चीन, जापान, दक्षिण कोरियालिसे मेगु देय्यात १२.५ प्रतिशत तकया उच्च शुल्क लागू याःगु दु ।
मेखे इयुलिसें ताइवान, जापान, दक्षिण कोरिया, स्वीट्जरल्याण्डयात अमेरिकालिसे जूगु न्हापायागु व्यापार सम्झौताकथं छुं सहुलियत दइ ट्रम्प प्रशासनं न्ह्यथंगु दु ।
अमेरिका, मेक्सिको व क्यानाडा स्वतन्त्र व्यापार सम्झौता अन्तर्गत लाइगु ज्वलं, छुं उर्जा उत्पादन, साः व इस्पातलिसें आल्मुनियम थेंज्याःगु क्षेत्रगत शुल्क अन्तर्गत लायेधुंकूगु ज्वलंतय्त धाःसा न्हूगु व्यवस्थापाखें छुट बियातःगु दु ।
अमेरिकां थुकथं न्हूगु भंसार शुल्क घोषणा यायेधुंकाः जापानं थुकियात ‘दुर्भाग्यपूर्ण’ धासें असन्तुष्टि प्वंकूगु दुसा अस्टे«लियाया व्यापार मन्त्रीं थुकियात ‘अन्यायपूर्ण’ पलाःया संज्ञा बिउगु दु ।
ट्रम्प प्रशासनया थुगु पलाः डोनाल्ड ट्रम्प अमेरिकी राष्ट्रपतिइ थगुने हाकनं सत्ताय् लिहां वयेधुंकाः तच्वःगु विश्वव्यापी व्यापार युद्धया लिपा लिपांगु पलाःया रुपय् काःगु दु ।
LEAVE YOUR COMMENTS