जापान सम्राटया गद्दी आरोहण

येँ – जापानया सम्राट नारुहितों छगू भव्य समारोह दथुइ राजगद्दी आरोहण यानाबिज्याःगु दु । वसपोलया अबु अकिहितों राजगद्दी परित्याग यायेवं ५९ दँया नारुहितो वंगु मे महिनाय् जापानया सम्राट जुयाबिज्याःगु खः । पुलांम्ह सम्राट अकिहितों नं कायया राजगद्दी आरोहण समारोहय् उपस्थित जुयाबिज्याःगु खः ।

थीथी परम्परागत विधि दथुइ नारुहितों औचापरिक रुपं गद्दी आरोहण यानाबिज्याःगु खः ।जापानय् छुं न्हि न्ह्यव वःगु समुद्री वाःफय् हगिबिसया कारणं धनजनया क्षति जूगुपिं पीडितपिंत सहानुभूति प्रकट यायेगु निंतिं राजगद्दी आरोहणया इलय् ग्वसाः ग्वयेगु तयारी यानातःगु शोभायात्रा धाःसा स्थगित याःगु दु ।

हगिबिस वाफसय् लानाः थ्यंमथ्यं ८० म्हेसिया ज्यान वनेधुंकूगु दु ।समारोहय् सम्राटपिंसं विशेष अवसरय् पुनिगु परम्परागत वसः पुनाः नारुहितो साढे ६ फिट तजाःगु ताकामिकुरा राजगद्दीइ च्वनाबिज्याःगु खः । अन वसपोलं छगू लिखित भाषण ब्वँसें राष्ट्र व जनताया एकताया प्रतीकया रुपय् थःगु उत्तरदायित्व वहन यायेत संविधान कथं ज्या यायेगु धासें शपथ ग्रहण यानाबिज्याःगु खः ।

उगु समारोहय् वसपोलया जहान सामाज्ञी मासाको लिक्कसं मेगु हे गद्दीइ च्वनाबिज्याःगु खः । वसपोलं झिंनिबः दुगु वसः पुनाबिज्याःगु खः । समारोहय् प्रधानमन्त्री शिन्जो आबें सम्राटयात भिंतुना बिसें संबोधन यानादीगु खः । थ्व लिपा वय्कःया नेतृत्वय् उपस्थित सकसिनं ‘बान्जाई’ अर्थात सम्राट चिरायु जुइमा धकाः नारा थ्वयेकूगु खः ।

थुगु समारोहय् बेलायतया राजकुमारी लिसें थीथी देय्या प्रतिनिधिपिं नं उपस्थित जूगु खः । ज्याझ्वलय् नेपाःपाखें राष्ट्रपति विद्यादेवी भण्डारीं नं ब्वति काःगु खः । जापानय् संवैधानिक राजतन्त्र दुसा अन सम्राटया भूमिका आलंकारीक जक जुइ ।