‘ट्रम्पं अमेरिकी सुरक्षा निकायय् क्षति यानाथकल’

एजेन्सी – अमेरिकी राष्ट्रपतिइ निर्वाचित जो बाइडेनं डोनाल्ड ट्रम्प प्रशासनं अमेरिकाया सुरक्षा निकाय बांमलाक क्षति यानाथकूगु खँ धयादीगु दु। वय्कलं थःपिंत आः नं रक्षा मन्त्रालय लिसें थीथी निकायपाखें आवश्यक सुचंत वयाच्वंगु मदुगु खँ धयादीगु दु ।

राष्ट्रिय सुरक्षा व विदेश नीति स्वइपिं थःपिनि सल्लाहकार पुचःलिसे सहलह यायेधुंकाः वय्कलं थ्व खँ धयादीगु दु । बाइडनं वइगु जनवरी २० तारिखय् राष्ट्रपति पदभार ग्रहण यानादीत्यंगु दु। तर आःया राष्ट्रपति डोनाल्ड ट्रम्पं धाःसा आःतकं थःगु हार स्वीकार यानादीगु मदुनि ।

अमेरिकाय् राष्ट्रपतिइ त्यायेवं पदभार ग्रहण यायेस्वयां न्ह्यव हे महत्वपूर्ण सुचना बीगु प्रचलन दुगु खःसां नोवेम्भर ३य् जूगु चुनाव लिपा नं बाइडेनयात हप्तौं तक थज्याःगु प्रक्रियाय् दुमथ्याकूगु खः ।