बेलायती दरबारय् मेम्ह म्ह्याय्मचा

एजेन्सी÷ बेलायती राजकुमार ह्यारीया कलाः राजकुमारी मेगनंं निम्हम्ह सन्तान कथं म्ह्याय् बुइकूगु दु । शुक्रवाः सुथय् म्ह्याय बूगु घोषणा यासें मचाया नां लिलिबेट ‘लिलि’ डायना माउन्टब्याटन विन्डसर जूगु जानकारी बिउगु खः । मेगनं क्यालिफोर्नियाया छगू अस्पतालय् मचा बुइकूगु खः । राजकुमार ह्यारि व राजकुमारी मेगनं छगू वक्तव्य जारी यासें मां व मचा निम्हेसियां स्वास्थ्य बांलाःगु खँ धाःगु दु ।
अथेहे बर्किङघम दरबारं नं छगू वक्तव्य जारी यासें महारानी, प्रिन्स अफ वेल्स व डचिस अफ कोन्र्वल लिसें ड्युक व डचिज अफ क्याम्ब्रिज नं थ्व खबरं लय्तागु खँ धाःगु दु ।

राजकुमार ह्यारि व मेगनं थः म्ह्याय्या नां तापाअजि महारानी एलिजावेथयात थः परिवारयापिंसं सःतिगु नां लिलिवेट पाखें क्वकयाः तयागु धाःगु दु । महारानीं न्हापा मचाबलय् थःगु वास्तविक नां बांलाक उच्चारण याये मसःगुलिं लिलिबेट धकाः नां बियातःगु खः ।

अथेहे दथुया डायना नां धाःसा मचाया अजि मदुम्ह प्रिन्सेस अफ वेल्सया सम्मानय् तयागु खँ विज्ञप्तिइ धयातःगु दु । बेलायती प्रधानमन्त्री बोरिस जोन्सनं यक्व बधाइ धाःगु दुसा लेबर नेता सर केअर स्टारमरं गज्जबया खबर धकाः सन्देश बिउगु दु ।

राजकुमार ह्यारिया नकतिनि बूम्ह म्ह्याय महारानी एलिजावेथया ११ औं छुइ खः, अथे खःसां राजगद्दीया हकदारय् धाःसा च्यागूगु नम्बरय् लाइ । लिलिबेट बुइवं सन् १९६०इ राजगद्दीया निम्हम्ह उत्तराधिकारी कथं बूम्ह राजकुमार एन्ड्रिउ धाःसा गुंगू थासय् लाःवंगु दु ।

३६ दँ दुम्ह ह्यारि व ३९ दँ दुम्ह मेगनं सन् २०१८ य् ब्याहा याःगु खःसा उमि छम्ह काय आर्ची नं दु ।

नेपालभाषा टाइम्स

च्वमिया मेमेगु

• भ्वँतय् न्हापांखुसी नेपालभाषा साहित्य तःमुँज्या
• न्हूदँया लसताय् येँ–चौतारा मोटरसाइकल र्‍याली
• संस्कृतिविद् गणेशराम लाछिया ७५ क्वःगु बुन्हि हन
• लुँया भावय् न्हूगु कीर्तिमान
• नेपालय् न्ह्यानाच्वंगु जुजुवादी आन्दोलन, भारतीय हिन्दूत्वया लिच्वः