ने. सं. ११४३ तछलागा चौथी -

मचा बुइकेत साइकल गयाः अस्पताल वंम्ह सांसद

एजेन्सी- न्यूजिल्यान्डया छम्ह सांसद मचा बुइकेत ब्यथा जुइवं साइकल गयाः अस्पताल वंगु दु । अस्पतालय् थ्यंगु घौछि लिपा हे वं मचा बुइकूगु खः । सांसद जुली एन जेन्टरं साइकल गयाः वनाच्वनागु किपा फेसबुकय् पोस्ट यासें च्वःगु दु, ‘ब्यथा जूबलय् साइकलय् गयेगु जिगु छुं योजना ला दुगु मखु, तर अथे हे यायेमाल ।’ सांसद जेन्टर स्वदँ न्ह्यः नं थथे हे साइकल गयाः अस्पताल वनाः मचा बुइकूम्ह खः ।

ग्रीन पार्टीया यातायात मामिलाया प्रवक्ता जुयाच्वंम्ह ४१ दँया सांसद जेन्टर साइकलिङ पक्षय् न्ववाना वयाच्वंम्ह खः । अमेरिकाय् बूम्ह जेन्टरं थः व थः भाःतं साइकल गयाः हे अस्पतालय् वनेगु निर्णय यायेत छुं मछिं मजूगु खँ नं धाःगु दु ।

न्यूजिल्यान्डय् तःम्ह हे सांसदतय्सं थःगु कार्यकालय् हे मचा बुइकेगु याः । सन् २०१८ य् न्यूजिल्यान्डया प्रधानमन्त्री जसिन्डा आर्डनं पदय् दुगु इलय् हे मचा बुइकूगु खः । थथे प्रधानमन्त्री जुयाच्वंगु इलय् हे मचा बुइकूम्ह जेसिन्दा विश्वया हे निम्हम्ह मिसा खः । थ्व लिपा यक्व हे राजनीतिकर्मी मिस्तय्सं थःगु ज्याय् वनेबलय् मचा ज्वना वनेगु व स्तनपान याकेगु सुरु याःगु खः ।

तर वंगु मंगलवाः बेलायतया लेबर पार्टीया सांसद स्टेला क्रिजीं स्वला दुम्ह मचा ज्वनाः हाउस अफ कमन्स वंगु खँय् धाःसा विवाद जूगु दु । वयात अन मचा ज्वनाः वनेगु अनुमति मदुगु खँ धाःगु खः । मचा ज्वनाः वनेत तःगु प्रतिबन्धयात कयाः आः छगू समितिं समीक्षा यानाच्वंगु दु ।