पर्यटकतय् उजुरी अप्वल

येँ – नेपाः भ्रमणय् वयाच्वंपिं विदेशी पर्यटकतय्सं थःपिंत ठगे याःगु, लुटपाट याःगु, पाकेटमारे याःगु लिसें दुव्र्यवहार याःगु धासें उजुरी बीगु अप्वयावःगु दु । पर्यटक प्रहरीइ चालु आर्थिक दँय् जक खुसःगू उजुरी दर्ता जूगु दु । नेपाः चाःहिउ वःपिं विदेशी पर्यटकतय् सुरक्षा व पर्यटकयात जुइगु समस्या ज्यंकेगु निंतिं वि.सं. २०३५ सालय् हे स्थापना जूगु पर्यटक प्रहरीइ विदेशी पर्यटकतय्सं उजुरी बिउ वयाच्वंगु खः ।

पर्यटक प्रहरीं पर्यटकतय्त आवश्यक सुचना बीगु, पर्यटकपाखें वःगु उजुरीइ छानविन यानाः कारवाही यायेगु, लाइसेन्स मकासे गाइड याइपिंत नियन्त्रण यानाः कारवाही यायेगु, फौजदारी अपराध सम्बन्धय् सम्बन्धित दूतावासय् स्वापू तयाः स्थानीय प्रहरी मार्फत कारवाही यायेगु, होटल, ट्राभल एजेन्सी आदिया निरीक्षण यायेगु ज्या याना वयाच्वंगु दु ।

पर्यटक प्रहरीइ दकलय् अप्वः सामान तंगु उजुरी लानाच्वंगु दु । पर्यटक प्रहरी एकाइ भृकुटीमण्डपया प्रमुख प्रहरी निरीक्षक अमृतबहादुर बस्नेतया कथं सामान तंगु जक ४५४ गू उजुरी लानाच्वंगु दु । थ्व बाहेक चालु दँय् जक खुयाकाःगु ९८ गू, ठगे याःगु २४ गू, लुटपाट याःगु स्वंगू, पाकेटमारे याःगु खुगू, दुव्र्यवहार याःगु प्यंगू, दुर्घटनाया छगू, क्षतिया प्यंगू व मेमेगु खुगू उजुरी दर्ता जूगु दु ।

पर्यटक प्रहरीं थौंकन्हय् स्वनिगलय् झिगू व स्वनिगः पिनें झिंखुगू थासं पर्यटकयात सेवा बिया वयाच्वंगु दु ।सरकारं सन् २०२० यात नेपाल भ्रमण वर्ष घोषणा यायेधुंकाः पर्यटक प्रहरीया आवश्यक्ता व औचित्य अप्वया वनाच्वंगु दु । पर्यटक प्रहरी कार्यालयं आः रारा ताल, बाँके, कञ्चनपुर, इलाम, धनकुटा लिसें गुंगू प्रमुख पर्यटकीय गन्तव्यया निंतिं पर्यटक प्रहरी माग याःगु दु ।

प्रहरीं थौंकन्हय् पर्यटक प्रहरी मोबाइल एप्स नं संचालनय् हयाच्वंगु दु । थ्व एप्सय् पर्यटक प्रहरी दइगु थाय्, पर्यटकं नेपाः च्वनाजःछि यायेजिउगु, यायेमजिउगु ज्याया जानकारी, हटलाइन नम्बर, दुर्घटना जुल धाःसा प्रहरीइ खबर यायेगु तरिका, पर्यटकया प्रतिक्रिया च्वये जिउगु कथं दयेकातःगु दु ।

विदेशं वःपिं पर्यटक मध्ये ९० प्रतिशत पर्यटक ठमेलय् दुहां वइगु जूगुलिं ठेमलय् हे महानगरीय पर्यटक सूचना कन्द्र नं संचालनय् हःगु दु । थन च्वंगु केन्द्रं पर्यटक प्रहरीया मू ज्याकू भृकुटीमण्डपं बीगु सेवा सुविधा थनं हे बीगु खँ धाःगु दु । पर्यटक प्रहरी नेपाल प्रहरीया जूसां उमित बीगु सेवा सुविधा धाःसा पर्यटन विभागं बिया वयाच्वंगु दु ।

पर्यटक प्रहरी परिचालन निर्देशिका मदुगु, थीथी देय्या भाय्या ज्ञान मदुगु, पर्यटक प्रहरीयात आवश्यक तालिम मदुगुलिं पर्यटक प्रहरी दुने नं थीथी समस्या दु । पर्यटन विभागया महानिर्देशक डण्डुराज घिमिरें पर्यटक प्रहरीया आवश्यक्ता स्वयां मेमेगु थासय् नं विस्तार यानायंकेगु खँ धयादीगु दु ।

सम्बन्धित बुखँ

LEAVE YOUR COMMENTS