चारुमति विहारय् अन्तर्राष्ट्रिय त्रिपिटक वाचन
येँ- चाबलिइ च्वंगु चारुमति विहारय् न्हापांखुसी अन्तर्राष्ट्रिय त्रिपिटक वाचन ज्याझ्वः जुल । चारुमति बुद्धिष्ट मिसन व थाई–चाइना पे्रmण्डशीप एशोसियसनया मंकाः ग्वसालय् वंगु शनिवाः उगु ज्याझ्वः जूगु खः । नेपाल भ्रमण वर्ष–२०२० यात अन्तर्राष्ट्रिय रुपय् प्रवद्र्धन यायेगु ल्याखं उगु ज्याझ्वः जूगु खः ।
त्रिपिटक वाचन ज्याझ्वलय् नेपःया थेरवाद, महायान व वज्रयान यानाः स्वंगुलिं निकायपाखें सत्याम्ह व भारत, श्रीलंका, थाइल्याण्ड, म्यान्मार, कम्बोडिया, लाओस लगायतया देशं ७० म्ह भिक्षु भिक्षुणीपिनिगु उपस्थिति दुगु खः ।
ज्याझ्वलय् स्वदेशी व विदेशी बौद्ध भिक्षुपिंसं पाली भासं हे छक्वलं त्रिपिटक वाचन यासे विश्व शान्ति व राष्ट्रिय कल्याणया निंतिं कामना नं याःगु खः ।
बौद्ध धर्मय् दकलय् महत्वपूर्ण व पुलांगु ग्रन्थया रुपय् दयाच्वंगु त्रिपिटकय् स्वंगू निकाय दु । भगवान बुद्धं बुद्धत्व प्राप्त याना बिज्यायेधुंकाः थःगु जीवनया अन्तिम इलय्तकं बियाबिज्याःगु प्रवचन व उपदेशयात बुद्ध शिक्षाया रुपय् संकलन यानातःगु पवित्र ग्रन्थया रुपय् कयातःगु दु ।
त्रिपिटक वाचन ज्याझ्वः स्वयां न्ह्यः उकिया प्रचार प्रसार यायेगु ल्याखं छगू साइकल ¥याली नं याःगु खः।
नेपाली कांग्रेसया नेता गगन थापां उलेज्या यानादीगु साइकल ¥याली चाबहिलिं शुरु जुयाः गौशाला, त्रिभुवन विमानस्थल, ग्वार्को, सातदोबाटो, लगंख्यः स्तुपा, थीथी बौद्ध सम्पदास्थल चाःहिलाः हाकनं चारुमति विहारय् थ्यंकाः क्वचाःगु खः । त्रिपिटक वाचनया निंतिं चारुमति विहार परिसर व उकिया जःखःया लागा चिटिक्क यानातःगु खःसा नेपाली सेनां सुचुकुचु यायेगु ज्याय् ग्वाहालि याःगु खः ।
ज्याझ्वःया संयोजकलिसें विहार प्रमुख तपस्सीधम्म महास्थविरं थुकथंया ज्याझ्वलं थीथी देय्या दथुइ मैत्री व धार्मिक सद्भाव कायम जुइगु नापं भगवान बुद्धं बियाबिज्याःगु शान्ति व अहिंया सन्देश अन्तर्राष्ट्रिय जगतय् नं न्यंकेत ग्वाहालि जू वनीगु विश्वास प्वंकाबिज्यात ।
थुगु हे ज्याझ्वः अन्तर्गत आइतवाःकुन्हु ख्वपया मुनि विहारय् सत्याम्हेसित प्रव्रज्या नं याःगु खःसा राष्ट्रिय सभागृहय् थाई–नेपाल सांस्कृतिक सम्पदा समारोह अन्तर्गत सांस्कृतिक ज्याझ्वः नं जूगु खः।
LEAVE YOUR COMMENTS