ने. सं. ११४३ ञलाथ्व चतुर्दशी -

येँ महानगरया विशेष अधिवेशन क्वचाल

येँ- येँ महानगरपालिकाया विशेष अधिवेशन क्वचाःगु दु । वंगु फागुन ४, २४ व २६ यानाः स्वन्हुयंकं च्वंगु बैठकया लिपांगु न्हिं संगठन संरचना, कर्मचारीया सेवा, शर्त सुविका, दरबन्दी, कार्य विवरण लगायत थीथी प्रस्ताव पारित यासें महानगरया विशेया अधिवेशन क्वाःगु खः ।

बैठकया लिपांगु न्हिं संशोधन सुझावसहित येँ महानगरपालिकाया कर्मचारीया सेवा शर्त, सुविधा, संगठन संरचना, दरबन्दी, कार्यविवरण स्वीकृत याःगु खः । विशेष अधिवेशनया स्वन्हुया न्हिया बैठकं येँ महानगरया कर्मचारीया सेवा, शर्त, सुविधा व्यवस्था यायेत दयेकूगु विधेयक–२०७७’ सुझावसहित पारित याःगु खः । थुगु विधेयकय् कर्मचारीया नियुक्ति, कार्यरत अवस्थाय् पालना यायेमाःगु आचरण, अवकास प्राप्त यायेधुंकाःया सर्त व सुविधा लगायत व्यवस्था यानातःगु दु । वंगु फागुन २४ गते पेश याःगु थुगु विधेयक स्वीकृतिलिसें आः महानगरय् प्रशासन, प्राविधिक व विविध यानाः स्वंगू समूह कायम याःगु दु ।

बैठकय् विधायन समितिया सदस्य सचिव वसन्त आचार्यं महानगरया संगठन संरचना सम्बन्धि व्यवस्था, प्रशासन विभाग प्रमुख महेश काफ्लें दरबन्दी व कार्यविवरण व्यवस्था सम्बन्धी विधेयक पेश यानादीगु खःसा थुकियात संशोधनसहित पारित याःगु खः।

विधेयक पेश यानाः पारित याःगुयालिसें आः महानगरया संरचनाय् १६ गू विभाग, ३५ गू महाशाखा व ६९ गू शाखा दइगु जूगु दु । ज्याया व्यवस्थापन व स्रोतया अवस्थायात सूचकया आधार कयाः आः कायम जुयाच्वंगु गुलिखे विभागयात मेगुलिइ स्वायेगु, छुं छुंया नां संशोधन यानाः संगठन संरचनाया प्रस्ताव यानातःगु खः । पारित प्रस्तावकथं वातावरण विभाग अन्तर्गत दुगु यन्त्र उपकरण आपंलि प्रशासन विभाग मातहतय् दइगु जूगु दु । थुकथं हे राजस्व, सहरी विकास, कानून, न्याय तथा मानव अधिकार, सामाजिक विकास, वित्त, सहकारी, शिक्षा, सूचना प्रविधि, विपद व्यवस्थापन, संस्कृति, सम्पदा, पर्यटन, योजना व अनुगमन यानाः झिंछगू विभाग दइगु जूगु दुसा प्रत्येक विभाग मातहतय् निगू निगू महाशाखा दइ ।

वंगु फागुन ४ गते शुरु जूगु अधिवेशया न्हापांगु बैठकं समायोजन सम्बन्धय् व्यवस्था यायेत दयेकूगु विधेयक २०७७ स्वीकृत याःगु खः । थ्व ऐनया लिधंसाय् १५५० म्ह कर्मचारीया छगू तह बढुवा यानाः च्वय्या पदय् समायोजन पौ नं लःल्हाःगु खः ।