छगू जक भासं आखः ब्वंकीगु शिक्षा विधेयक संशोधन याइगु

येँ – सरकारं छगू जक भासं शिक्षा बीगु नीति कथं हःगु विधेयक संशोधन याइगु जूगु दु । संघीय समाजवादी फोरमया सांसद राजेन्द्र श्रेष्ठया कुतलं उगु विधेयक संशोधन जुइत्यंगु खः । वय्कलं छगू जक भासं राज्यं शिक्षा बीगु उचित मजू धासें उकियात संशोधन यायेमाःगु प्रस्ताव दर्ता यानादीगु खःसा उकियात स्वीकार यासें सरकारं शिक्षा विधेयक संशोधन यायेत्यंगु खँ सांसद श्रेष्ठं ‘नेपालभाषा टाइम्स’ यात कनादिल ।

शिक्षा विधेयकय् मातृभाषां आखः ब्वंकेगु अधिकार ला दइ तर अज्याःगु स्कूल धाःसा सम्बन्धित भाषाभाषी थःपिंसं हे चायेकेमाः धकाः च्वयातःगुली मातृभाषां आखः ब्वंकीगु स्कूल नं सरकारं हे चायेकेमाः धकाः संशोधन जूगु खँ सांसद श्रेष्ठं कनादिल । थीथी जातिया मांभासं आखः ब्वंकेगु दायित्व नं सरकारया हे जुइ धइगु खँ विधेयकय् दुथ्याःगु खँ वय्कलं कनादिल ।

अथे हे विधेयकय् प्राविधिक, साधारण, व्यावसायिक व संस्कृत यानाः शिक्षाया प्यंगू प्रकार दइ धकाः च्वयातःगु खँय् नं आपत्ति क्यँसें सांसद श्रेष्ठं ‘संस्कृत’ धइगु शिक्षाया प्रकार मखु, उकिं उकिया थासय् ‘भाषिक÷सांस्कृतिक’ खँग्वः तयेमाः धकाः मेगु संशोधन प्रस्ताव दर्ता यानादीगु दु । शिक्षा विधेयकया थ्व विषयय् संसदया सुं हे जनजाति, मधेसी सांसदतय्सं चिउताः मतःगु खँय् नं वय्कलं दुःख प्वंकादिल ।